«Голосы Русинів Підкарпатя» – середа, 18.10 год.

В днешнім выданю представиме вам другу часть інтервю із справцьом русиньской Вікіпедії і русиньскым лінґвістом з Підкарпатя Томашом Калинічом.

Побісідуєме детайлніше о його прорусиньскій актівістічній діятельности в просторах інтернету. А так само звідати ся будеме нашого респондента о творчіх планах до будучности.

Ключовы темы інтервю:

• Шпеціфіка роботы над русиньсков Вікіпедійов
• Youtube як інштрумент шыріня русиньского языка і културы з погляду Томаша Калиніча
• Перспектівы і тяжкости розвитку русинства про сучасне русиньске поколіня

Томаш Мірославовіч Калиніч народив ся 15-го юна 1994-го року в русиньскій родині в місті Ужгород, Підкарпатя. Отець і ціла його файта родом з Хусту, а мамчина з Великого Березного і Драґова.

Як говорить сам респонент: «з дітинства николи єм дома не говорив по русиньскы, бо выростав єм в атмосфері новой україноязычной моложавы.» Закінічів повну середню освіту, а то єденадцять клас, в роднім місті. Наслідно в році 2010 пішов на высокошкольскы штудії на Ужгородьску універзіту на Катедру меджінародных односин. На УжНУ (Ужгородьска державна універзіта, позн. ред.) штудовав лем три рокы, бо ани спеціалность, ани сам навчалный приступ не успокойовали його желаня і представы. В році 2013 пішов штудовати до Прагы на Карлову універзіту, де і вступив на высненый штудійный одбор – обща філолоґія і фонетіка. По штудіях ся оженив і ся переселив ся до Шкотландії, де і днесь жыє з свойов женов.

І, фактічно, іщі од школьскых часів юный Томаш ся інтересовав русинством. Респондент підчаркує, же спочатку го привабльовали шпеціфічны языковы особливости його родного міста, а пак вже і цілого підкарпатьского реґіону. За даякый час ся почав анґажовати і в прорусиньскім русі вєдно з далшыма молодыма актівістами.

Єдным з такых першых проєктів было тлумачіня інтерфейсу популарной на Підкарпатю російской соціалной сіті Вконтакте. А онедовгом як была сотворена русиньска Вікіпедія, Томаш Калиніч зачінать писати властны статі на русиньскы темы і робити над перекладами чуджых текстів про сайт. Так стає офіціалным справцьом той самой русиньской інтернетовой енціклопедії, а послідній піврок веце актівно робить над технічнов сторонов сайту.

В сучасности попри тім веде прорусиньске анґлоязычне конто This Day in Rusyn History на сіті Twitter, де од юна 2020-го року майже каждый день публікує тематічный твіт односно конкретного дня в русиньскій історії. Автор поділив ся з нами, же од юна 2021-го року хотів бы вести іщі єдно таке саме конто, лем по русиньскы. Так само од недавна актівіста веде свій властный русиньскоязычный канал з розважалным обсягом.

В нашім інтервю Томаш Калиніч не раз звертав увагу на недостаток фотографій, котры офіціално мож схосновати про повноцінну роботу русиньской Вікіпедії. Вшыткых вас, нашы дорогы слухачі і чітателі, справця русиньской інтернетовой енціклопедії просить даровати свої фоткы, што суть повязаны хоць у якійсь мірі з русинством, до общого жрідла Вікіпедії за тым мотузком.

То може быти фотка вашого села, або фотка даякого памнятника, або монументу у вашім краю, бо і такый мінімалный вклад ку розвитку русинства так само ся рахує!

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА