«Голосы Русинів Підкарпатя» – середа, 18.10 год.

Фурт стрічам ся з різныма людми на «Голосах Русинів Підкарпатя», не раз сьме дотыкали ся темы войны. Самособов, коли тісячі Карпаторусинів воюють, боронячі нелем державу, у котрій жыють, але і свої родины, затуляючі собов Европу, і мало не каждый день приходять до русиньскых родин страшны новины, про войну говорять вшыткы.

Як каже герой книжкы Володьо Девян, о котрім днесь буде бісіда: «Коли мацкаль прийде сюды, боронити нашу землю буде пузно, тому сперти го треба чим дале од Закарпатя» .

Володимір Олексійовiч Девян, герой днешнього выданя проґраму, є автором книжкы «Доброволець: спогади про сина». Книжка вышла у выдавництві «РІК-У» на кінцю 2024-го року. Автор  взяв ся за перо, абы написати книжку за свого сына – добровольника, котрый в першых місяцях войны пішов на фронт і вмер в децембрі 2022-го року.

Отець взяв ся за книжку, жебы задавити біль, котра так і не перешла; жебы не допустити кривити історію, як то было по «Револуції достойности» 2014-го року; жебы память про його Володьку жыла і надале, жебы жыла навсе.

Тоты мамины віршовы шорикы вказують як вызерать отцьовскый і материньскый жали:

Тот буль страшный, што прямо в серце бє,

Як плуг, што наяри ся в землю вглублять.

Ти думаш,  може, з часом  одыйде?

Йой, то не так,  бо ун ся лем прибулшать.

Тот буль такый, ги тот їдкый червак,

Што вдну  упняв ся й там тя тихо точить,

Кліщами в серце врізав ся, ги рак,

И всьо жытя та  рана кровоточить.

Слухайте «Голосы Русинів Підкарпатя» в середу 9-го апріля 2025 р. о 18.10 год., або повторіня в четверь 10-го апріля о 4.30 год. і в суботу 13-го апріля о 11.00 год. за русиньскым часом.