«Голосы Русинів Підкарпатя» – середа, 18.10 год.

Не раз єм собі думав, што як бы файно было теперь побісідовати на «Голосах Русинів Підкарпатя» з прощеныма бы тітанами карпаторусиньского ренесанса – Іваном Туряницьом, Васильом Сочков-Боржавином, Михаілом Алмашійом, Людвігом Філіпом, Васильом Сарканичом і другыма.

Што бы они повіли? Як бы оцінили днешню сітуацію і перспектівы нашого народа?

Так як вшыткы высше спомянуты вже не можуть за себе повісти, рішыв єм поговорити з їх дітми. Бо хто може знати за нянька ці мамку веце як їх наслідникы? Тоты, кого старшына привела на світ і помогла стати на ногы?

Так дівка Михаіла Алмашія – Валентіна Кабай, котра свого нянька не лем любила, а обожньовала, свято честує і його память. Самособов, она знає за отця вшытко: кым робив, котры дотримовав цінности, якы мав гобі, што раховав  пріорітным.

Валентіна може за Михаіла Івановіча бісідовати годинами, і постає перед нами справды гармонічна постава геніалного педаґоґа і музиканта, перфектного  керівника, ідеалного отця, мудрого общественного діятеля.

Слухайте «Голосы Русинів Підкарпатя» в середу 26-го марца 2025 р. о 18.10 год., або повторіня в четверь 27-го марца о 4.30 год. і в суботу 29-го марца р. о 11.00 год. за русиньскым часом.