«Голосы Русинів Підкарпатя» – середа, 18.10 год.

Петро Куцкір – єден з карпаторусиньскых патріотів, котрый іщі у 1987-ім році основав у Мукачові музичну ґрупу «Руснакы». Першый раз заграли «Руснакы» «Вручаніє» Духновіча на річніці Івана Сільвая у Новім Давідкові в 1988-ім році.

Тота музична ґрупа грає і днесь. Грає і має честь у людей. Правда, вже без Петра Петровіча. Но Куцкір быв  головов «Руснакув» понад 20 років.

За свій жывот наш герой пережыв много. Од маленького зачав співати, у школі быв солістом, робив на многых роботах. Лем головов села Лохово быв Петро Куцкір 15 років. Бісідує про свою роботу головы як о найтяжшых часах.

На днесь заслуженый діятель културы Україны, істинно народный гудак Сріберной Землі Петро Куцкір має свою капелу «Бетярі», основану ним у 2012-ім році. Грають «Бетярі» на Підкарпатю і за граніцьов, несучі Русинам їх културу, їх співаночку.

Слухайте «Голосы Русинів Підкарпатя» в середу 12-го марца 2025 р. о 18.10 год., або повторіня в четверь 13-го марца о 4.30 год. і в суботу 15-го марца р. о 11.00 год. за русиньскым часом.