«Голосы Русинів Підкарпатя» – середа, 18.10 год.

Русиньску народну співанку, котру будеме чути на початку, співать Вікторія Балог. Она є єднов із тых русиньскых співачок, котры оддають гудацьтву, музиці цілый жывот.

Одколи тямить себе – співала і гула фурт. Нянько їй мав нещастя вєдно з родинов, же у 1947-ім році з Бардейова, на выходній Словакії, были переселены на Україну. А коли пробовали вернути ся, то дійшли лем до Миная, што коло Ужгорода, а там родина лишыла ся. Якраз нянько і привив любов Віці до музикы.

Вікторія закончіла Ужгородьске музичне училищя ім. Дезідерія Задора, робила в музичній школі, співала у ансамблі.

Много ся поміняло, коли у 2017-ім році она познакомила ся з русиньсков поетков Лесьов Стецьовіч Адамовов, і тота попросила єй написати музику до дакотрых співанок. Так появили ся «Горличка», «Мамин коврик» і «Червена ниточка». Вікторії в штудіу записати ся подарило лем «Горличку».

У тім проґрамі окрім вже спомянутых першый раз прозвучать іщі дві співанкы на слова Лесі і музику Вікы. То «Мавка» і «Запряжу я быстрого коня».  Віка про наш проґрам в lem.fm заспівала їх в супроводі гітары концертовой віртуозкы Тарновецькой Дітячой школы умень Інны Петрушевской.

В будучности Віка хоче продовжовати писати музику до русиньскых стихів,  і выдати діск. А іщі занимати ся флорістіков про бізніс і про файны емоції.