Голос за десять міліард евр

Якбач не є в тых хвілях темы, котра бы веце інтересовала медії, мінімално в Европі, як саміт Европской унії, котрый днесь зачав. Европскый саміт є все інтересным матеріалом, но теперь о то веце, же якраз на нім вырішує ся, ці з Українов почнуть ся приступовы їднаня.

Ясне ніт приступовым їднаням звучіть лем з Будапешту. Премєр Віктор Орбан, але і міністер загранічных діл веце раз авізовали, же подля Мадярьска Київ не є приготовленый на такы їднаня. Навеце, же на то ани не є приготовлена Унія.

На другім боці стоять верьховны представителі Унії, котры намагають ся пересвідчіти Мадярьско, яке має право вета єднако як вшыткы членьскы країны і в тій темі, жебы країна одкликуюча ся на державу Святого Штефана не блоковала початок їднань з країнов, котра дістала штатут кандідата.

Інтересным передсамнітовым фактом є, же якраз вчера, день перед зачатком саміту, Европска комісія одблоковала про Мадярьско десять міліард евр із еврофондів. Решта грошей, котры мали іти Мадярьску, зістала заблокована, але десять міліард є в кешені. А теперь прийде тот найважнішый момент.

Европска комісія, котра грошы заблоковала і довгодобо крітіковала Мадярьско за стан правной державы, недостаточну незалежность юстіції, день перед самітом сконштатовала, же реформы, котры зробила в тых справах влада Віктора Орбана на зліпшіня стану, суть в згоді з пожадавками Брусела, на котрых ся обидві стороны добісідовали. Чудо пречудесне.

Може бы на тім не было ничого чудного, кебы ся десять міліард не увольнило якраз день перед самітом, а то в сітуації, коли Орбан ясно декларує, же схоснує в припаді Україны право вета.

По тім, што днесь Орбан пришов на саміт до Брусела, далше декларовав незмінену позіцію, і повів, же не є в тій справі о чім діскутовати, бо не были сповнены условія. Од новинарів дістав і вопрос (або припомянутя?), як спринимать то, же было Мадярьску увольненых десять міліард евр, на што одповів, же ту, на саміті, не є, жебы рішыти бізніс або обходны договоры, але жебы представляв мадярьскы позіції і прінціпы.

Повім щіро, кебы мало мати купованя голосу дакотрой членьской країны якыйсь сценарь, не вызерав бы іншак як тот, котрый вчера зреалізовала Европска комісія. В часі писаня коментаря не знаме, ці то буде мати ефект на Віктора Орбана, вызерать же ніт, но важнішым є дашто інше.

Без огляду на то, што вшытко можеме крітіковати на політіці Орбана, а не є того мало, мінімалні што до прав народностных меншын на Україні має мадярьскый премєр абсолутну правду. А тяжко бісідовати о сповніню условій в тій темі, єдной із основных пожадавок Унії, кедь видиме, якый пашквіл з новелізаціями законів минулу пятніцю прияла Верьховна рада Україны.

О ґаранціях народностных прав на европскій уровни не мож в рамках того пашквілу, приятого на послідню хвілю і лем на око, ани снити.

Тоты самы гражданы бы собі мали усвідомити, же кедь днесь хтось звертать увагу на несповніня условій, не є то про їх зло, але скоріше про їх добро.

Але жебы дістати ся ку тому найважнішому. Я абсолутно розумію гражданам Україны, їх тугам, жебы чімскоріше почали приступовы їднаня, жебы чімскоріше была якась векша надія на членство, і кедь досправдове членство є музиков будучности, а днесь уж і дакотры европскы представителі бісідують ясно, же далекой будучности.

Но тоты самы гражданы бы собі мали усвідомити, же кедь днесь хтось звертать увагу на несповніня условій, не є то про їх зло, але скоріше про їх добро.

Гражданы Україны бы собі мали усвідомити, же Европска унія не є лік на вшыткы хвороты. Брусел за них проблемы не порішыть. Проблемы не счезнуть ани приступовыма їднанями, а ани рядным членством.

Посмотьме ся на Румунію, котра дістала членство без вырішеной корупції а бороти ся з ньов мусить доднесь. Посмотьме на Іспанію, котра має проблемы з теріторіалнов цілостьов, і кедь є членом днешньой Унії од 1986-го року.

Посмотьме ся на Іспанію і Ґрецію, котры змолола фінанчна кріза в роках 2008 – 2009 вдяка їх злій фінанчній політіці, і кедь были членами еврозоны. А посмотьме ся наростаня ксенофобії, націоналізма нелем в новшых членьскых державах з комуністічнов минулостьов, але і в „старых“ демокраціях. Посмотьме ся на наростаня авторітатівной політікы.

Тоты, але і далшы приклады бісідують ясно, же Унія автоматічно не вылічіть то, што є в державі хворе, а докінця має Унія веце средств на лічіня перед вступом і початком приступовых їднань, як по тім.

Просто повіджено, кедь жытелі Україны хотять жыти в досправдовій европскій країні, котра решпектує і аплікує европскы штандарды і цінности, пак їм самым бы мало залежати на тім, жебы наприклад то, што днесь бісідує Віктор Орбан односно народностной політікы, было серьйозно вырішене. Іншак в тій неевропскій політіці Київ буде продовжовати.

Україна ся не змінить в єднім моменті на европску демокрацію. То довша путь, на котрій ся мусять робити серьйозны крокы.

Будьяк скінчіть саміт, ці голос за десять міліард наконець буде купленый або ніт, проблемы Україны собі і так буде мусити країна і їй жытелі вырішыти дома. Іншак то буде лем така гра на европску Україну.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.