«Голос». Оперовый лемківскій голос піде світом

Дария Кузяк, абсольвентка Музичной Академіі ім. Кароля Ліпіньского во Вроцлаві, рыхтує велику річ. Буде з розмахом.

​«Голос то байкова істория о двох сестрах, котры розділила Доля, але Туга вперто стремила до іх стрічы, а Памят спричынила, што на вікы ся получыли» – оповідат Дария Кузяк, творчыня оперового видовиска, котре буде запрезентуване на осін того рока во Вроцлаві.

Лемківскій фольклор, клясична музика, електроніка

Авторскій проєкт «Голос» Дариі Кузяк то скомпонуваный ньом твір на два соловы оперовы голосы, камеральну оркєстру і лемківску капелю. То єднак не вшытко, бо Дария скомпонувала до твору іщы верству електронной музикы, а звучати будут тіж фраґменты хоровой церковной музикы.

Выже вымінене то єст тото, што односит ся до верствы звуку. Кєд іде о дальшы смыслы, то видовиску товаришыти будут ріжнорідны танці – народны, запрезентуваны танцюристами ансамблю Кычера, та модерный танец в выконаню акторів Театру Розбарк з Бытомя. Хореоґрафком видовиска буде Анна Пьотровска.

«Горы Карпаты, Лемковина. То гев вшытко ся зачало. То гев жыли нашы дідове і то гев розвивала ся наша лемківска культура. Інча нич вшыткы. Хтоси хтіл тото одобрати, але тота культура дале ся розвиват і то мы єй твориме» – передає артистка в специяльні накрученым фільмі, в котрым заохочат підперти зреализуваня оперы.

А є то велика ініциятива, што анґажує десяткы осіб (!), задумана з розмахом, шыроко і вельоверствово, зато тіж вымагат векшого буджету. Для высокой культуры є то характерне, што треба єй зовнішні підперати і глядати того підпертя де ся лем даст – зато апель артисткы і до вас – каждый може доложыти свого ґрайцаря, жебы домопочы вказати світу сучасну лемківску штуку. Заходте на сайт соспільной колекты zrzutka.pl – «Premiera łemkowskiej opery “Hołos”».

Нацийональне Форум Музикы ім. Вітольда Лютославского во Вроцлаві

До участи в проєкті артистка запросила вельох професийных творців. Oперовым представліньом задириґує Якуб Пшыбыцєнь, узнаный уж дириґент i гушляр молодого поколіня, наштоден жытель швейцарского Цуріху, Лемко з Зеленой Горы. В своім доробку має м.ін. спілпрацу з єдном з найліпшых оркєстр на світі – London Symphony Orchestra в рамках конкурсу Donatella Flick Conducting Competition, а сезоні 2023/2024 полнил функцию асистента маестра Людовіка Морльо при Симфонічній Оркєстрі Барцельоны і Нацийональній Оркєстрі Катальоніі.

Режысерком видовиска буде Оксана Терефенко, театральна акторка, режысерка, вокальна інструкторка, вокалистка ансамблю Coolbaba. Послідні рокы режысерує JarmaRock FEST, остатньо тіж і Медженародный Фестіваль «Світ під Кычером». Сценоґрафію до представліня «Голос» запроєктує Моніка [іка] Вуйцік, малярка, сценоґрафка і костюмоґрафка, абсольвентка Академіі Красных Штук в Ґданьску. Представліню буде товаришыл голос нарратора до тексту авторства Павла Блоха та ґрафічны візуализациі. Нарратором буде Кірил Пєтручук, молодый лемківскій актор, знаный з ролі помічника коваля Мацєя з популярного сериялю «1670».

Выступлят:

• Юстина Блюй – сопран,
• Александра Міхнєвич – мецосопран,
• Оркєстра Леопольдінум з Нацийонального Форум Музикы,
• капеля і танцюристы Лемківского Ансамблю Пісні і Танця «Кычера»,
• танцюристы Театру Розбарк.

Премєра видовиска заплянувана єст на 24. листопада/новембра тр. в Червеній Сали Нацийонального Форум Музикы ім. Вітольда Лютославского во Вроцлаві.

Дария Кузяк

Дария Кузяк (вр. 1997 р. в Ґлоґові) – композиторка, активістка, аніматорка лемківской культуры. Абсольвентка Музичной Академіі во Вроцлаві в клясі композициі проф. Ґражыны Пстроконьской-Навратіль. В своім доробку має близко двадцет камеральных, симфонічных і електронных творів, котры были выконуваны вчас ріжных концертів і фестівалів.

Дария Кузяк єденадцет років была членкыньом Лемківского Ансамблю Пісні і Танця «Кычера», в котрым грала на гушлях, а тіж підперала орґанізацийні Медженародный Фестіваль «Світ під Кычером». Є членкыньом ансамблю н’лем folk. В 2016 році здавала матуру з лемківского языка. Разом з інчыма молодыма Лемками з Нижнього Шлеска провели інформацийну акцию перед Повселюдным Списом 2021 під назвом «ЯЛемко».