Хмелівске Свято хліба

У селі Хмельова в Бардейовскім окресі (колись Комлоша) ся 2-го октобра того року одбуде уж 17-ый річник Фолклорных свят – Дні русиньскых традіцій або як Хмелівчане кличуть – Свято хліба.

Свято зачне дополідне святов літурґіов у ґрекокатолицькім храмі. Пополідне буде проґрам продовжовати в салі културного дому. Ту буде про участників приготовлена выстава старого ремеселного знарядя і керамічного кумшту. Потім ся одбуде традічный святочный акт – благословліня хлібів, колачів, вина і коштованя тых божых дарів землі.

Хмелівске Свято хліба буде продовжовати богатым културным проґрамом, котрый окрем домашніх діточок з матерьской школы, солісткы Маріанны Железной, співу Марії і Патріка Шуркаловых з Бехерова, людового росповідача Йожка Йожкы, приде збогатити і наш професіоналный колектів ПУЛС із Пряшова.

Орґанізаторами свята є село Хмельова, Вышньошарішскый освітній центер в Бардейові, Русиньска оброда – Реґіоналный клуб в Бардейові і Ґрекокатолицька парохія в Хмельовій. Подія є реалізована з фінанчнов підпоров Уряду влады Словацькой републікы – проґрам Култура народностных меншын 2016.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА