«Гіст в ЛЕМ.фм: Юрий Новосільскій» – четвер, 10.30 год.

Просиме слухати архівальну бесіду з Юрийом Новосільскым з колекциі проф. Олены Дуць-Файфер. Професорка награла для потомных інтервю з Новосільскым в 1993 році з нагоды 70. річниці народин артисты. Юрий Новосільскій представлят в ним своє розумліня Лемковины, а тіж одчутя і звязкы з лемківском культуром. Емісия бесіды одбуде ся в четвер 9. лютого/фебруара тр., початок 10.30 год., повторіня в пятницю 10. лютого/фебруара о 3.00 год.

На основі реченой бесіды проф. О. Дуць-Файфер опубликувала в «Лемківскым Календари» на 1993 рік статю пн. О Юрию Новосільскым в 70-ту річницю його народин.

Сойм Польской Республикы в специяльным схваліню рішыл, што 2023 рік буде Роком Юрия Новосільского. 7. січня/януара припала 100. річниця народин того выдатного маляря, теоретика штукы, педаґоґа, філософа, реліґійного думателя, уважаного за єдного з найвыдатнійшых сучасных писателів ікон.

В схваліню посанці припомнули, што артиста, якій векшіст жытя звязаный был з Краковом, то єдна з найвыдатнійшых персон сучасной культуры в Польщы. Обшыри, в якых реализувал ся протягом жытя тот выдатный твроця, то очывидно малярство і рисунок, але тіж артистична педаґоґіка, діяльніст для промоциі і підпераня штукы. Был тіж Новосільскій автором вельох текстів о кумшті і вірі. Як філософ барз дуже присвятил роздумам на тему окружаючого го світа.

Новосільскій зробил выпосажыня і поліхроміі інтерєрів чысленных православных, грекокатолицкых і римокатолицкых храмів. В творчости світского характеру брал з осягнінь аванґардовой штукы і традициі візантийского малярства. Його штуку до днес узнают за унікатове явиско, што лучыт сферу сакрум і профанум.