ХІ Стріча Любителів Низкого Бескіду

Вшыткы любителі Низкого Бескіду та порталю beskid-niski.pl уж 11. раз будут мати нагоду зыйти ся і спільні провести інтересуючий вікенд на Лемковині. В днях. 20.-22. листопада/новембра в Ждыни буде проходила ХІ Стріча Любителів Низкого Бескіду.

Явил ся уж проґрам тогорічной едициі і, як все, заповідат ся цікаві і атракцийі. Перший ден стрічы то уж традицийні – показ фільмів повязаных з Низкым Бескідом. Того рока заплянувано презентацию найновшого документу Кжыштофа Кжыжановского Нарід штоси смутний, треба го розвеселити (о фільмі писали сме більше гев), та тогорічну премєру – фільм Мариі Сільвестрі і Джона Ріґетті – Перемінены през Талергоф (о тым документі можете шырше почытати гев або гев). Оба тоты фільмы мали своі проєкциі в Рускій Бурсі в Ґорлицях.

Другій ден стрічы зачне ся подля выробленой уж схемы – прогульком. В тым році вынятково атракцийном для любителів бескідской природы – по незнаных кутиках Низкого Бескіду опроваджал буде Зенон Войтас, працівник Маґурского Державного Парку, а окрем того знаменитий фотоґраф бескідской природы (позерайте за знимками його авторства). Дальша част тіж буде звязана з природом. Пополудньовий цикль прелекций зачне Анна Гречка, яка оповіст про грибы Низкого Бескіду. Представникы Стоавришыня Карпатіка оповідят про досліджаня міґраций птахів в Низкым Бескіді і про акцию, яку ведут в тій обшыри. Даміан Новак з Маґурского Державного Парку заглубит ся в тему крикуна (лат. Aquila pomarina), а Владимір Каріо буде бесідувал про коні в Низкым Бескіді. Вечер прелекций закінчыт Шымон Моджеєвскій, якій запрезентує підсумуваня робіт Стоваришыня Маґурич в 2015 році.

Окрем того, вчас ХІ Стрічы буде мож поозберати вынятковий показ діапорамы, то є специяльного авдийовізуального спектаклю авторства Ґжеґожа Лесьнєвского і Марціна Станьчака під назвом Резерват Біосферы Східні Карпаты – наше спільне дідицтво. Буде то фотоґрафічна оповіст о єдным з найдикшых місц в Европі – символичным кінци світа на пограничы трьой держав: Польщы, Словациі і Украіны.

Конеча єст скорша резерваци місц. Більше дрібниц за тым мотузком. Радийо лем.фм зас мат приємніст быти медияльным патроном той подіі.