Гудаци зас святкуют

Гудаци, тріо музыкантів, як што рока просят на праздник дня свойого основаня. Тым разом буде то уж 7. річниця, а святкуваня проходило буде в найблизшу пятницю 15. січня/януара 2016 р. од 20.00 год. в Кольбушовій. Не бракне на ним лемківскых елементів.

Гудаци, Руснацка вязанка з другой платні тзв. білой.

В проґрамі свята:
– промовліня запрошеных гостів,
– традицийна уж доповід на важны темы, зрыхтувана згідні з обставинами,
– непередвидувальна музыка Карпат, Галичыны і не лем,
– концерт Романа Гаврана – лемківского барда,
– монолоґ лемківской артисткы Монікы Тылявской,
– концерт ансамблю «Вчерашній»,
– поезия і карпатска проза,
– гостина зрыхтувана през Ґаздів,
– концерт достойных Ювілятів.

Актуальний склад ґрупы то:

• Моніка Баран – гушлі, спів,
• Куба Авґустин – басы, спів,
• Ярко Мазур – гармонія, спів.

Ґрупа Гудаци од початків свого істнуваня грат шыроко поняту карпатску музыку. Велику част його репертуару занимают лемківскы співанкы. Окрем того, Гудаци співают по польскы, словацкы і циґаньскы. Ансамбль выконує творы, котры остали по давных карпатскых музыкантах. Выдал дві платні і заграл вельо концертів в Польщы і за границьом.

Актуальні ансамбль разом з лемківскыма співачками та Доротом Ямруз з ґрупы Коцірба (грат на альтовых гушлях), творят реконструкцийну ґрупу Міцне Зіля. Ґрупа тота занимат ся етноґрафічныма досліджынями і старат ся выконувати музыку Лемків згідні з єй найдавнійшима взірцями.