Грибкы [30.08 – 05.09]

Позберане за тыждень (30. авґуст – 5. септембер 2014)

Туск як інтерґалактічный презідент

В суботу цілым світом пановала вість, же новым „презідентом“ Европской унії буде польскый премєр Доналд Туск. Є то самособов ліпше, як Ромпуй, котрого мено доднесь 90 процент Европанів не знать, і 100 процент не знать, што коли робив у функції. А Туск собі то вдяка єднозначному погляду на україньску крізу і дало бы ся повісти заслужыв. А сомособов, є то великый успіх нелем польской політікы, але вшыткых посткомуністічных сердньоевропскых держав, же найвысшу позіцію в Унії має політік з їх реґіону. Нажаль, тота найвысша функція є може так важна, як выголосити ся за інтерґалактічного презідента. Інтересне про світ може быти то, ці Туск піде в польскых слідах. Кідь быв папом Поляк, в Европі ся вельо змінило. Наштаротвала ся нова епоха. Перестала несвобода, скінчів комунізм а Росія нас перестала тримати у своїх руках. І теперь бы ся могли, кідь є чоловік з Польші так важным політком, одограти великы зміны. Надіям ся, же то але не будуть аж такы зміны, же перестане свобода, скінчіть капіталізм а Росія нас зачне тримати у своїх руках.

Нова заступкыня Лемків

Коло Туска іщі зістанеме. Якбач в евфорії з новой функції, хотів по собі зохабити на остатній момент і глубокый слід меджі Лемками. І так 1. септембра в позіції премєра одкликав Олену Дуць-Файфер з функції заступкыні Лемків і покликав на тоту функцію Мирославу Копыстяньску. Тым ся на довгый час записав в русиньскім середовиску. Функцію в Бруселі му жычіме а віриме, же уж го до кінця його премєрованя не перепаде дітяча гравость чарбати свої ініціалы по каждім папері, котрый найде на столі.

Мір на Україні

В середу ґлосовав україньскый презідент Порошенко. Перед камерами росповідав, же му о пятій рано кликав Путін і доїднали тырвалый мір на Україні. Світ собі выдыхнув так на 57 минут і 30 секунд. Може за такый час уж реаґовав Кремель, котрый повів, же нич таке не было в раннім телефонаті доїднане, тадь предці Росія не є участником конфлікту. Поясніня є просте. Є знаме, же чоловік, кідь ся опє, має тендецнії кликати, хоць в ночі або скоро рано, своїм бывшым. А пак ся оправдать і ганьбить. Так якбач Путін в Кремли зробив рядну „парті“ у вівторок вечур, де святковали, же їх войска, котры на Україні не суть, мають Новоазовск під контрольов. З підвышенов уровньов алкоголу і він взяв телефон а мав велику потребу закликати своїй бывшій партнерці – Україні. Рано, кідь вытерезвів, ганьбив ся і бавив театер, же то істо не быв він. Але, кідь так роздумую, кібы сьме доказали тримати Путіна під впливом алкоголу, так, жебы не мав час вытерезвіти, є шанса, же досправды буде тырвалый мір.

Фіцо є обходный заступця Путіна

Фіцо тот тыждень святково спустив реверз ґазу зо Словакії на Україну. Тадь треба помагати братам. Тым братам, котрых нераз почастовав тот самый Роберт Фіцо, премєр Словакії, кідь повів, же їм не вірить. Но а такый реверз Фіцови розвязав язык так, як дотеперь іщі ніт. Кідь уж перед тым крітіковав санкції, котры не подля нього смысел, теперь остро выступать проти ним і хоче право робити выняткы про Словакію. Придали ся далшы Путіновы обходны заступцове в Европі Соботка і Орбан. На вопросы, ці небуде Словакія недоставріый партнер Европы а НАТО, кідь ся так справує премєр, Фіцо одповідать: Мы сьме пустили реверз. Хто о нас може похыбовати? То є мало, што сьме зробили? Фіцо уж але не споминать, же тот реверз заплатила Унія. Позітівом ганьбы, котру робить в Европі Фіцо, Орбан і Соботка є то, же Франція собі усвідомила, же до клубу тых політків, обходных заступців Путіна, не хоче належати а шыфы тіпу Містрал Росії наконець не дає. Франція так пришла о міліарды евро. Фіцо плаче, же сьме пришли о 6 міліонів. Но, хтось якбач іщі все перерахує на Словацькы коруны і видить ся му вельо і дрібны в кешені.

Не будуть радары, та будуть ракеты

Тот тыждень проходив і саміт НАТО. Америка ся перед пару роками рыхтовала одыйти з Европы. Сітуація на Україні але вызначно мінить позіцію. Днесь ся доїднало, же склад муніції буде мати НАТО і в Попраді, на Словакії. Перед пару роками хотіли США збудовати радары, протиракетову сістему. Роздумовало ся о Чеській републіці, о Польщі. Вова в Москві бухав по столі і быв проти. Обама, в рамках одходу з Европы стопнув і тот проґрам, жебы не денервовав Кремель. Днесь ся роздумує о новых воєньскых базах в Европі, о складі муніції. Но, Вова, не хотів єсь радары, будуть рівно ракеты.

Гало, ту Руськый Керестур  

Зясь по часі озвав ся і председа Світового конґреса Русинів Дюра Папуґа. У выголошіню пише, же підпорує підпорене, котре бы ся мало підпорити. Нич нове. Просто намага СКР о вызнаня Русинів на Підкарпатю є повторяня тых самых фраз, о котрых ся пересвідчує Світова рада на своїх засіданях під березками все в іншій державі, але реална діпломатічна робота, тиск, тото з боку СКР бракує. Але нашто, што то є проти „моралной підпорі“?

Новый портал

Но гей, дочекали сьме ся нового порталу lem.fm. Русиньскый і україньскый світ то несподівало а такой їх то наштартовало ку роботі. Сьме ради, же сьме підняли і їх продуктівіту роботы. Наприклад такый Ruthenpress, „професіонална пресова аґентура“ од 27. авґуста ціла якбач взяла собі вольно і не мав хто робити, бо жадны статі не были. А што? Тадь і так сьме найліпшы. Новый протал нашого радіа але вытерезвів професіоналів а такой третього септембра ся вернули до роботы. Файні.

Но а потім сьме наштаровали якбач і СФУЛО. Такой в четверь про істоту выдали новый „Вісник СФУЛО“, котрый є актуално на місяць юл і авґуст. Позітівнов новостьов є, же там не є надруковане жадне писмо Верховній раді, презідентови Україны ани СБУ, де бы на нас кликали тайны службы Україны. Также за ціле літо сьме мы, Русины, не зробили нич плане, за што бы сьме мали іти до арешту. Ґратулую нам.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА