«Говорить Пряшів» – пятниця, 20.00 год.

Пятниця, внет субота і неділя. Декотры годны си одпочати, а інчы цілком одворотні – суботу присвячают на тяжку роботу. Так і вызерат тото на нашых селах, а і в радию. Част редакторів лем в суботу годна робити проґрамы, реляциі, монтажы.

Призрийте ся, як чудово міняют кольоры нашы лісы, вершкы гір. То знак, што осін близко. Днес маме такой половину вересня/септембра. По правді за кус більше як тыжден привитаме тоту астрономічну осін. Знаме, што не все она приходит згідно з рахуваньом наукы, але в горах бодай уж пришла. Хоц текучий тыжден на Лемковині теплий і ніч не одстає од дня, то досправды внет буде нам уж студено і депресийно.

В «Говорить Пряшів» днес гідні лемківского. В Книжници.фм вызвучыт оповіданя Семана Мадзеляна пн. Квітуля. В Нашых целебритах про Юрия Мадараса, русиньского громадяньского діяча. Наконец потішыме каждого – по перерві вертают фельєтоны Теодозиі Латтовой.