«Говорить Пряшів» – другій тыжден лютого – середа, 20.00 год.

В Карпатах далі студін. Нич не попустило, мороз тримат, часом і снігу докурит. І хоц нас медиі од погоды – трафлят ся – часом баламутят, то неє ся што трапити, же за дуже дровна спалите. Хоц, по правді, то ліпше не палити, бо як сме ся дознали посліднім разом, в нас на Лемковині тіж уж є тот таємний смоґ. Не знаме як то в Пряшові або Ужгороді. Якоси не чути, жебы нарікали, же не мают чым дыхати.

Проблемы з хвильом, смоґом, морозом як все не вадят нашым пряшівскым камаратям. Зрыхтували про нас премєру поучытельного проґраму «Говорить Пряшів», котрий уж днес о 20.00 год. вызвучыт в ефірі ЛЕМ.фм.

В части Нашы целебриты слухайте про Марию Хомову з Габуры. В книжници радия Русин.фм буде мож почути дакы выімкы з творів Івана Калинича, а в Перличці о тым, як мадярскы жандары робили еґазміны з русиньского языка! Іщы лем Припоминка – в ній буде про громниці, так важны як іде о праздник Стрітіня Господнього.

За рамівком Русин.фм чытаме: Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.