«Говорить Пряшів» – четвертий тыжден марця – середа, 20.00 год.

І завитала. І пришла ґу нам. Яр – бо то на ню так долго ждала редакция лемківского радия. Хоц певно не лем мы, а вшыткы, што уж мали дост зимы, яка – што не чудо – найдолше все ся тримат в горах. Найлегше мают тоты з чужыны, бо гын, кєд кус снігу впаде, коли кус поморозит, та уж тратят голову і охоту до жытя. І не бесідуєме ту лем о нашых Лемках на чужыні – гейбы ніт! Найвекшы проблемы то все мают Американе, бо коли гын приде зима, та вшытко якоси так на два дни стає в місци, люде маркотніют, до роботы не ходят, а найбільше з того ся сміют тоты, што ся народили в старым краю і порядны зимы ім не страшны.

Но, але лишме уж тоту зиму. Пришла яр, што видно тіж на Карпатскій Руси, де сніг такой чысто стаял, морозу уж ніт. Ачий тота добра хвиля буде прихыльна орґанізувати всякы культурны подіі, фестівальчыкы, ай вкінци фестівалі. Найвекший пройде кіньцом мая во Свиднику – Русиньскій Фестіваль, але нич ґу томи приде, по дорозі находити ся будут і другы подіі. А видите – тепер ся вказало, же фурт тот «Говорить Пряшів» то добрий проґрам. Бо то в ним, окрем нашой істориі, літературы і другых тем, якыма ся маме право гордити, дознаєме ся дашто з культурных подій, в рамках Культурного калейдоскопу.

В «Говорить Пряшів» будут тіж і інчы справы – як все. Напримір, днес Вам пряшівска редакция Русин.фм оповіст в Перличці о выімку з ґазеты Карпатска Неділя з дня 15. липця/юлия 1940 рока, в котрій писало ся про тото, жебы в школах і русиньскій адміністрациі на Підкарпатскій Руси дотримувати принципів ґраматикы русиньского языка Івана Гарайды. Зато – самы видите – вартат.

Ждеме Вас по 20.00 год. за фльориньскым часом.

За рамівком Русин.фм чытаме: Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.