Ґорлицка церков освячена по проведеным ремонті

31. грудня/децембра 2022 р., по успішні проведеным ремонті, одбыло ся посвячыня ґорлицкой церкви Св. Тройці, яка явит ся катедром перемышльско-ґорлицкой єпархіі ПАПЦ.

В остатнім часі была зроблена нова підлога з огріваньом та придбано новы утенсилиі. Освячыня храму было такой завершыньом веденых од парох років ріжных прац, котры были повязаны з модернізацийом церкви. Скорше зроблено елевацию і вымінено выгляды та позолочено дальшы елементы іконостасу.

Наперед архієпископ Паісий пояснил вірным порядок чыну освячыня і його значыня.

Вчас першой літургіі, яка служена была на освяченым престолі одновленой церкви, вознесено молитвы за жертводавців і будівничых ґорлицкой церкви, в тым бл. п. владыку Адама (першого єпарху одродженой перемышльской єпархіі), а тіж вшыткых покійных прихожан. Молитвы возношено і за мир на Украіні, і жертвы акциі «Вісла», кєд же 2022 рік был роком 75. річниці тых траґічных подій.

Владыка Паісий подякувал вшыткым, котры в остатніх роках причынили ся до окрашыня ґорлицкой катедры. Подякуваня были переданы і в сторону о. Василия Ґалчыка, якій перед роками был будівничым храму, а тіж для теперішнього настоятеля, о. Романа Дубеца, якій продолжат дбаня о храм.

Ґорлицка церков была вознесена в роках 1986-1991 на пляні грецкого креста в візантийско-рускым стилю сакрального будівництва. Парохія была основана в 1985 р. декретом владыкы Адама, хоц історичны переказы подают, што православна церков в Ґорлицях істнувала уж в ХV ст. Церков была побудувана як памятник мученичой смерти св. Максима Ґорлицкого (од 2007 р. мощы святого находят ся як раз в храмі). Каждого рока 6. вересня/септембра проходят в святыни центральны богослужыня з нагоды дня памяти святого.