Ґорлицка Операция – прелекция в Варшаві

20. листопада мультімедияльном прелекцийом Романа Фродимы зачне ся наступний сезон Карпатскых Стріч, орґанізуваных Карпатскым Товариством в Варшаві. Член того же Товариства, єден з найліпшых знавців темы І Світовой Войны в Карпатах і галицкых воєнных цмонтерів, тым разом оповідал буде про подіі, якы попереджали Ґорлицку Операцию, про саму операцию – єй битвы, командирів, якы брали в ней участ, і про тото, што по операциі остало. Буде тіж о оружы, мапах і воєнных цмонтерях, розшмареных по Низкым Бескіді аж по ленію Вислока.

Вчас стрічы буде мож придбати сой остатню з книжок авторства прелеґента пн. Воєнны Цмонтері з І Світовой Войны. Круг І – Новий Змигород, Круг ІІ – Ясло.

Стріча буде проходила 20. листопада о 18.00 год. в Музею Землі при Польскій Академіі Наук в Варшаві.