Глядают выконавцю ремонту Музею Никыфора в Креници

Забытковый будинок Музею Никыфора в Креници буде одновленый. 15. марця т.р. скінчыл ся черговый термін складаня оферт на ремонт обєкту.

В вілли Романівка, в котрі має сідибу Музей Никыфора, заплянуваный є ґрунтовный ремонт. Змодернізуваны будут предовшыткым выставовы салі. Вымінены будут тіж дилины, бальконовы подесты та рынны. Окрем того заплянувано реновацию сходів, зробліня стежкы до будинку од страны подвіря, малюваня даху і переложыня косткы. Змодернізувана буде і котловня, а фраґменты будинку будут дотеплены.

На тым не кінчат ся плянуваны роботы. Вымінены будут выгляды, зовнішні двері та освітліня будинку. Музей буде ґрунтовні выремонтуваный для забезпечыня як найліпшой оферты для одвиджаючых.

Вілля Романівка, в котрій презентувана є творчіст Епіфана Дровняка, походит з другой половины ХІХ. ст. То будинок вознесеный в швайцарксым стилю. В 70. роках ХХ ст. будинок был знищеный і не запертый. До 1990 рока стоял при улици Пілсудского, пак го выремонтувано і перенесено в теперішнє місце, при Бульварах Дітля. В 1995 р. зорґанізувано гын музей присвяченый лемківскому артисті.

В музею презентувана є творчіст Никыфора, од ескізів, по рисункы з каждого етапу жытя артисты. Мож видіти його малярскій варштат, деревяны лады, туні фарбкы, папір, а тіж особисты памяткы, як напримір листы.

Окрем постійной експозициі, орґанізуваны сут в ним выставы выдатных польскых і заграничных артистів. Проходят гын концерты, конференциі ци авторскы стрічы. Музей діє як одділіня Округового Музею в Новым Санчы.