Ґеорґ Філіпп Телеман, «З повагом», просит Павел Малецкій – неділя, 20.00 год.

Ґеорґа Філіппа Телемана уважат ся за єдного з найважнійшых композиторів І половины XVIII столітя. Уж за жытя здобыл велику славу.

Ґеорґ Філіпп Телеман жыл в роках 1681-1767. Был німецкым композитором, орґаністом, капельмайстром та представником ґалантного стилю. Студиювал право на університеті в Лейпциґу. В молодости познал Ґеорґа Фрідріха Фендля, з котрым долгы рокы камаратювал.

По студиях жыл в ріжных містах в Німцьох, а тіж в Жарах на Лужыцах, де мал нагоду познати польску народну музику. Елементы той музикы вводил до своіх композиций, м.ін. до гушельных сонат цу суіты «Partie polonaise».

Телеман іщы за жытя вважаный был єдным з найбільшых німецкых композиторів, славнійшым аж і од Баха. Был барз плідным творцьом. Написал 37 опер, коло 2000 кантат, 13 ораторий, 52 пасий, 15 мес, 2 маґніфікаты, 16 мотетів, 32 псальмы, чысленны творы на специяльны нагоды, коло 1000 оркєстровых суіт (перетырвало лем більше як 130), сонаты на гушлі, клявесин, флет, концерты, камеральны творы ци пісні.

Ґалантный стиль (одповід на переполніня бароковом поліфонійом, характеризувал ся простом гомофонічном фактуром), якым ся занимал Телеман, видимый є головні в клявесиновых фантазиях і фуґах.

В проґрамі выслухате суіту ля-мінор, концерт фа-мажор, подвійный концерт ля-мінор та концерт до-мажор. Будут тіж знаны композициі од інчых клясиків.