Гаврош означать русиньскый проґрам за сепаратістічный

13-го авґуста 2015 р. была на інтернетовім сайті Радіа Свобода – його україньской редакції, в рамках рубрікы „Точка зору“ публікована далша статя Олександра Гавроша, котрый вже нераз у своїх коментарях выступав проти Русинам.

В його найновшій статі під назвов „Хто руйнує мир на Закарпатті“ занимать ся Гаврош особов Віктора Балогы і його полиітічов партійов „Єдиний центр“. Автор атакує силного закарпатьского політіка, котрый головно по остатніх змінах в ряджіню Закарпатьской области, котры настолив Київ, в рамках якых презідент Україны Петро Порошенко выменовав за голову Закарпатьской областной державной адміністрації Генадія Москаля – вызначного опонента Балогы, зачав білбордами робити кампань проти Київскым властям. В кампані ся у нього крітікують такы речіня, як же централна влада выступила проти Закарпатю, ці же влада руйнує мір на Закарпатю.

Гаврош вырахувавать вшыткы перепоїня Балогы і його родины на містну і централну політку і означує то за клан Балогы. Інтересніше є, же автор знова не забыв до той справы залучіти і Русинів.

Як пише, хоць Балога одмогать ся од сепаратізму, його „команда“ свого часу протисла, цітую, „абсурдне“ рішіня областной рады о вызнаню Русинів окремым народом, што подля Гавроша не має жадной юрідічной силы. Тоты самы люди, як Гаврош пише, дотягли до областной телевізії (телеканал Тиса, позн. редакції) „сепаратістічный проґрам“ Русиньска родина, яка подля слов Гавроша рекламує лідрів „політічного русинства, котры пошырюють українофобію на Закарпаті“.

Радіо Свобода стабілно припущать на свій сайт статі Олександра Гавроша і далшых авторів, котры пишуть неправды на Русинів, котры Русинів означують за сепаратістів, выдуманый „політічный“ народ і пошырюють русинофобію. На тото была вже звернута і увага Америцького конґресу, котрый радіо фінанцує, но дотеперь без ефекту.

Проґрам, о котрім пише Олександер Гаврош, під назов Русиньска родина, є традічный народностный маґазин, котрый давать простор русиньскым културным подіям, русиньскым културным і общественным діятелям, писателям, русиньскій історії ітд. Проґрам ниґда не служыв на пошырьованя українофовії, а інтересує ся жывотом Русинів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА