Гавриіл Бескид в проґрамі “Лемківска пропаґанда” – віторок, 20.00 год.

В проґрамі Пропаґанда о 20.00 год. голос забере мґр. Гавриіл Бескид, предсідатель Русиньского Культурно Освітнього Общества Александра Духновича в Пряшові, долголітній учытель істориі і росийского языка.

Гавриіл Бескид вродил ся 28. вересня 1929 року в Кошыцях, в родині Евгенія Бескида і Марты з Холошняів. Дітинство прожыл в русиньскым селі Леґнава (окр. Стара Любовня), сусіднє село до Мушыны і Милика. В Леґнаві його отец был грекокатолицкым священиком през 35 років.

В Леґнаві завершыл основну школу, пак вчыл ся в Грекокатолицкій Рускій Реальній Ґімназиі в Пряшові. Скінчыл педаґоґічну высоку школу в Братиславі, а дальше учытелювал в Леґнаві, Малым Липнику і в Пряшові. Гавриіл Бескид пише науковы і популярны дописы, присвячены вызначным історічным датам, людям і інституциям, котры печатаны были в редаґуваным през нього Русиньскым народным календарі, Бесіді, Вседержавным русиньскым вістнику на Мадярах , або печатаній в Чехах – Підкарпатскій Руси (Podkarpatská Rus).

Пан Бескид в першій з двох заплянуваных реляций оповіст про заслугы роду Бескидів для соспільного жытя Русинів і про родинны контакты з Лемками і Лемковином.