Ґамбаль, Трохановска і Фейса на матурі з лемківского языка

Того рока – інакше як влони – не треба было дзвонити до Центральной Еґзамінацийной Комісиі (ЦКЕ), жебы скоро подала матуральны аркушы з лемківского языка на свій сайт по скінчыню часу на написаня іспыту. Нашол ся там без нашой інтервенциі, зато і маме змогу представити го в нас.

Незалежні од того, і так сме задзвонили до ЦКЕ, жебы потвердити чысло абітуриєнтів, котры того рока підходили до матурального іспыту. Уж вчера на нашым портали писали сме о першых вражынях тогорічной матуранткы, Дариі Кузяк, котра оповіла о емоциях, звязаных з писаньом еґзаміну з лемківского языка, але як дознали сме ся в ЦКЕ, а пак потвердили в Округовій Еґзамінацийній Комісиі во Вроцлаві, на іспыт з лемківского языка записала ся іщы єдна особа. Вроцлавскій одділ комісиі не мал іщы даных, ци тота особа підышла до еґзаміну, зато дотепер напевно знаме лем о єдній тогорічній абітуриєнтці, котра, як уж сме донесли вчера, выбераючы спосеред двох, рішыла заняти ся першом темом. А были то:

• Тема 1.: На основі даного фраґменту тексту передстав проблем і порозважай над ним. Выкорыстай тезу і думкы автора і однес ся на іх основі до інчого тексту культуры. Твоя працa повинна чыслити не менше як 300 слів. (текст: Богдан Ґамбаль, Три Поколіня),
• Тема 2.: Зроб порівнуючу аналізу і інтерпретацию вершів. Твоя праца повинна чыслити не менше як 300 слів. (вершы: Штефанія Трохановска, Лем небо над нами наше і Янко Фейса, О люде).

Барз нас тішыт, же авторы тогорічных матуральных тем спомогли ся текстом, котрий был опубликуваний на нашым портали, авторства Богдана Ґамбаля, редактора порталю lem.fm, тыжденника ЛЕМ.фм+ і шефредактора радия Лем.фм. При нагоді хочеме іщы раз поґратулювати Дариі Кузяк, же підышла до тогорічного матурального еґзаміну з лемківского языка. Выбрана тема, вказуюча на скоро ідучу асиміляцию і вынародовліня, не єст легком темом. Зато похыляме головы низко, заохочуючы будучых матуратнів зголошувати ся до наступных іспытів з лемківского языка.

Полний аркуш тогорічного матурального еґзаміну з лемківского языка найдете на сайті Центральной Еґзамінацийной Комісиі.