Ґальовий Концерт на фестівали «Молода Лемковина» – відеокліпы

Запрашаме до обзераня відекліпів з другой части фестівалю «Молода Лемковина». Як і в першій части – было ріжнорідні, кольорово, на высокым рівни, а царствувала – очывидно – авторска творчіст.

Концерт зачала Терочка – анамбль діючий при Стоваришыню Руска Бурса. Ґрупа заспівала м.ін. Горы, нашы Горы Петра Мурянкы.

Барз приємным і кус одмінным акцентом подіі был короткій театральний выступ помедже музыком. Присутніст Марияна Марко, директора Театру Александра Духновича заохотила Театр Терка до представліня монодрамы «Груба Берта» Івана Желема, в бравуровий спосіб выконаной Настком (Моніком Тылявском), яку од понад штырьох років чуєте в радию лем.фм (Слуховиска, Лем.фм Нажыво і ін.).

Клюб Демоль то ансамбль, якій дотепер чули сме в лем.фм в двох доцяп інчых одмінах. Тепер вказали іщы третю – попри народно-клюбовій – лірычну і вражливу.

Дуляровы Братя то ансамбль, якій, як раз, на тогорічным фестівали зачал промувати свою нову платню з лемківском музыком. Послухайте короткій спойлер. До слів Івана Русенка з музыком Петра Мурянкы, Дулярі додали кус легкости, забавы і сучасности.

Хто слідит артистычну дорогу Сусанны, тот не раз чул, як важне місце в єй репертуарі занимат творчіст Мурянкы – примір найдете долов.

Петро Мурянка закінчыл артистычну част фестівалю. З акомпаніяментом Ігоря – Маестра циі, почули сме Шковраночка, котрий має уж статус культовой пісні, яка дочекала ся вельох ріжных інтерпретаций і преображынь.

На тым кінчыме презентацию вшыткых выконавців фестівалю лемківской авторской творчости. Неодолга в радию лем.фм буде мож послухати ретрансмісиі з цілой подіі, а окрем того і даякы наступны фільмы принесеме на порталь.