Ґалерия Стармах презентує русиньскых творців

На мастерскы рисункы Енді Варголя мож позерати од 5. квітня/апріля 2017 р. в ґалериі Андрия Стармаха в Кракові. Енді Варголь то клясик модерного кумшту XX ст. Был тым, якій вызначыл напрямы розвитку артистичной творчости на будуче, а і сам остал символом поп-арту. Його статус мож зрівняти зо славом звізд рока. Был еманацийом артистичной атмосферы Ню Йорку, диктатором моды і стилю. Народжений в родині русиньскых еміґрантів з Карпатской Руси, был тым, якому зъістил ся «америцкій сон».

На выставі в Стармах Ґалериі не сут вказаны славны ґрафікы, лем рисункы і шкіцы Варголя. Вшыткы походят з колекциі Рафаеля Яблонкы, німецкого колекцийонера польского походжыня. Як повідат – Варголь был вызначным рисовником. Творил іх протягом цілого жытя. На выставі мож видіти перегляд крислярскых можливости Варголя од сороковых років. Можеме позерати на творы зроблены ріжныма техніками. Найвеце єст тых, писаных олівцьом (клийбасом) і тинтом. Остатній рисунок на выставі походит з 1986 р. То «Тайна вечеря» з передставліньом Ісуса Христа з двома апостолами. Єст то єдна праца з циклю, якій Варголь докінчыл перед смертю.

На цілій выставі вказуют парудесят творів Енді Варголя і мож іх відіти в Кракові, ул. Мадярска 5, до 12 мая т.р. в год. 11.00-18.00. Galeria Starmach, ul. Węgierska 3, 30-535 Kraków.