Фотореляция з початку шкільного рока в Рускій Бурсі

В минулу суботу (3. жолтня/октобра) в Рускій Бурсі в Ґорлицях было кольорово, голосно, забавово, радісно і напевно барз весело (позерайте долов на знимкы). Діти малювали на мурі, робили лялькы-мотанкы, вчыли ся співанкы, творили до ней акомпаніямент на перкусийных інструментах та школили лемківскій язык вчас языковых забав. Был тіж малий почастунок, а кажда дітина взяла зо собом свойой роботы мотанкову лялю, в голові нову співанку,  деякы новы лемківскы слова і вельо радісных вражынь.

На розпочатя приіхало близко 80 діти з учытельками: Варваром Дуць, Анном Дильонґ, Орином Гутиряк і Анном Рыджанич та з парома мамами і єдном бабом як додатковыма опікунами. Присутны в бурсі діти приіхали м.ін. з Баниці, Бодаків, Бортного, Высовы, Ганчовы, Ґладышова, Ждыні, Конечной, Реґєтова і Устя Ґорлицкого. Велика шкода, же бракло місцевых діти, од учытелів Мирославы Дубец та о. Романа Дубеца.

Початок шкільного рока был зорґанізуваний для вшыткых учеників лемківского языка для доцініня, же цілий час находят ся діти і молодіж, якы берут на своі плечы додатковы, необовязковы лекциі, бо сут свідомы (подібні як і родиче, якы зголашают участ діти в занятах) вартости, яка плыне з вчыня ся рідного языка і розуміют, як важным єст знаня го не лем в бесідуваній, але тіж писаній версиі. Вчас лекций з лемківского языка познают тіж історию і богатство культуры свого Народу в ріжных єй аспектах.

Вшыткым школярям, желаме приємного вчыня і уж тепер запрашаме на закінчыня шкільного рока, жебы вынагородити ім труд наукы лемкіского языка 🙂

За фотореляцию дякуєме Даміанови Новакови.