Фотоґрафічна выставка Зо жывота Русинів Івана Чіжмаря

11-го юна 2021-го року о 15.30 год. у выставных просторах Піддукляньского освітнього центру в Свіднику одкрыють фотоґрафічну выставку під назвов Зо жывота Русинів од автора Івана Чіжмаря.

Выставка є орґанізована із нагоды 85-ых народенин Івана Чіжмаря, котры собі припомяне 12-го юна.

Іван Чіжмарь ся народив 12-го юна 1936-го року в Сухій, дітьскы рокы пережыв у Пстрині. Є знамым русиньскым етноґрафом, музичным фолклорістом, фотоґрафом і філмарьом. Выштудовав етноґрафію і музичну фолклорістіку на Універзіті Яна Еванґелісты Пуркінє в Бырні.

Цілый жывот актівізовав ся у области збераня, документації, як і інтерпретації русиньскых народных співанок з вызначныма професіоналныма музичныма тілесамі як Бырняньскый орхестер народных інштрументів (BROLN) Бырно з прімашом Їнджіхом Говорком, Орехстер народных інштрументів (OĽUN) Братіслава з прімашом Мірославом Дудіком, Шарішан Пряшів, Народна музика Бескід, котру основав і вів аж до 1996-го року.

Як музейный робітник співпрацовав з професором Каролом Пліцком, професором Душаном Голым, як і з вызначныма фаховцями в области етноґрафії і музичной фолклорістікы на Словакії, ку тому належала і співпраца при баданю і реалізації Етноґрафічного атласу Словакії.

Як сценаріста брав участь при творіню фолклорных фестівалів у Свіднику, Меджілабірцях, Вышній Ольшаві. Як автор документарістічной фотоґрафії публіковав у періодічній пресі, фаховій літературі, як і у властных публікаціях о матеріалній і духовній културі Русинів на Словакії.

У выставных просторах Піддукляньского освітнього центру буде выставка Івана Чіжмаря під назвов Зо жывота Русинів приступна до 12-го юла т. р.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА