Фолклор дорослых присвяченый Чокиновій у Вігорлатьскім музею

Як інфомровала редакцію Яна Федічова із Вігорлатьского музею в Гуменнім, музей кличе любителів, підпорьователів і носителітв фолклорных традіцій ку участи на реґіоналнім конкурзі автентічной фолклорной музикы і співу – Музичный фолклор дорослых.

Реґіоналне коло про окресы Гуменне, Снина і Меджілабірці буде проходити 16-го септембра 2017-го року в ареалі сканзену Вігорлатьского музею в Гуменнім.

Конкурз є заміряный на ожывльованя і всокочіня традічного фолклору реґіону Вышнього Земпліна як вызначного елементу културной дідовизны реґіону. Частьов події буде і споминковый проґрам присвяченый памяти недожытых 70-ых народенин Марії Чокиновой, родачці зо села Убля, вызначній русиньскій інтерпретці автентічного фолклору.

Конкурзна переглядка є заміряма інтересуючім ся в соло і дуо співі, співацькым ґрупам, народным музикам і солістам інштрументалістам. Про приголошіня ся до конкурзу є треба мати вік мінімално 15 років, музичный репертоар лем з областей Вышнього Земпліна, і выступати треба в народнім крої. Хто має інтерес брати участь на конкурзі, треба то оголосити до 25-го авґуста 2017-го року на адресі: Vihorlatské múzeum v Humennom, Námestie slobody 1, 066 01 Humenné і на копертку написати Regionálna súťaž hudobného folklóru dospelých 2017. Вшыткы детайлны інформації мож найти і на офіціалнім сайті Вігорлатьского музею в Гуменнім.

Журі выбере із выступаючіх окремых інтерпретів і колектівы, котры будуть пак выступати на 11-ім річнику Фестівалу славяньской взаємности, котрый буде проходити в тот самый день, 16-го септембра, по закінчіню конкурзу в Гуменнім.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА