Фіцо добісідовав ся з Мадярами на народностнім законі. Уповномоченый говорить о схоснованю існуючой верзії

Основов про приготовліня закона о поставліню народностных меншын може быти матеріал, котрый выпрацовав у попереднім періоді Уряд уповномоченого влады Словацькой републікы про народностны меншыны.

Про аґентуру TASR то в понедільок 29-го януара 2024-го року повів новый владный уповномоченый про меншыны Акош Горонь, котрый быв повіреный приправов леґіслатівы. Матеріал, на котрый ся Горонь одкликує, Уряд увпономоченого приготовив іщі під веджіньом Ласла Буковского, котрый быв меншыновым уповномоченым од 2016-го року до октобра минувшого року.

Правдоподобно буде треба новый леґіслатівный замір

Горонь підкреслив, же перед продовжованьом приправы пропозіції закона правдоподобно буде треба створити новый леґіслатівный замір.

„Аж по тім кроку можеме почати робити на самім законі, што, самособов, не вылучує схосновати уж існуючу робочу верзію,“ повів уповномоченый з тым, же сам єй поважує за добрый початочный документ.

Єдночасно акцентовав, же цільом є приготовити пропозіцію, котра буде мати шансу быти схвалена. „О фіналній верзії буду вести переговоры з окремыма резортами, жебы єм представив цілый матеріал,“ додав Горонь.

Сучасна влада закон не плановала

Ісотіря закона о поставліню народностных меншын іде аж до періоду влады Петра Пеллеґріні, рр. 2018 – 2020, коли односно той темы прияв узнесіня і обовязав словацьку владу робити на такім законі Выбор про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.

Кабінет  Іґора Матовіча у своїм Проґрамовім выголошіню влады із 2020-го року замір прияти такый закон мав. Так само тот замір зістав і у Проґрамовім выголошіню влады кабінету Едуарда Геґера з 2021-го року. Приправов быв повіреный Ласло Буковскый, втогдышній уповномоченый про меншыны.

Ку приправі закона была створена і експертна робоча ґрупа, в котрій мали представителів і меншыны, а текст пропозіції закона ся подарило зробити.

Буковскый докінця з готовов пропозіційов зачав контактовати представителів народностных меншын, і конзултовав приготовленый текст. Влада Геґера наконець цілому процесу дала стоп, без офіціалного поясніня, хоць приятя было уж і в леґіслатівнім плані влады на 2022-ый рік.

Замір прияти такый закон не мала за ціль пак ани урядницька влада Людовіта Одора, котра фунґовала куртый час в році 2023.

Сучасный кабінет Роберта Фіца такый замір так само не дав до свого Проґрамового выголошіня влады із октобра 2023-го року. О народностнім законі не было нич написано ани в Плані леґіслатівных задач влады СР на рік 2024, котрый быв публікованый в децембрі минувшого року.

Премєр добісідовав ся з Мадярами

О зміні погляду премєра Роберта Фіца на тоту проблему інформовали іщі в пятніцю 26-го януара представителі партії Magyar Szövetség – Мадярьска аліанція. Аліанція інформовала о „назоровій згоді“ з премєром і міністерков културы Мартінов Шімковічовов.

„Премєр быв согласный з потребов кодіфікації леґіслатівы, котра дотулять ся народностных меншын, і їй приправов повірив уповномоченого влады про народностны меншыны Акоша Гороня,“ повіла говоркыня партії Еві Палінкаш.

Міністерка културы мала так само представителям мадярьской партії потвердити, же не дійде ани ку злучіню Фонду на підпору културы народностных меншын а Фонду на підпору уменя, што было наплановане на 2024-ый рік, і проти чого поставили ся представителі меншын і умелецькой комуніты.

Партію Magyar Szövetség веде як председа Крістіан Форро (на змимці), котрый кандідує і в презідентьскых выборах, якы одбудуть ся в марці того року.