Фінісаж выставы «Кольорова церков» в Бортным

Музей Дворы Карвациянів і Ґладышів в Ґорлицях одділ Мазярска Загорода в Лоси з церквом в Бортным просят на фінісаж выставы «Кольорова церков». О выставі заявляли сме гев, а пак принесли сме вам обшырну реляцию з вернісажу.

3. жолтня (октобра) т.р. о год. 16.00 в церкви свв. Космы і Даміана в Бортным в час фінісажу остане підсумуваний цілий проєкт під назвом «Кольорова церков», котрого выстава была частю. Буде запрезентувана інтерактывна аплікация на дотыковий екран, якій замонтуваний буде в притворі. Завдякы тій аплікациі буде мож звидіти таку церков, яком была она колиси. Така была ціль той выставы, котра припоминала не о тым, што єст – а о тым, чого уж неє, а інформациі записаны і зафіксувны на все в аплікациі і доступны в каждым моменті справлят, же минуле оджыє і заістнує в нашій памяти на долше.

Oстатнім пунктом фінісажу буде выклад Анджея Жыґадла під назвом Дослідничы і документацийны роботы при забытковых деревяных объєктах.

Анджей Жыґдало – абсольвент Выділу Малярства АКШ в Кракові. Тепер студент V рока консервациі малярства на Выділі Консервациі і Реставрациі Діл Штукы той же учельні. Стипендиста Міністра Культуры і Народового Дідицтва. Автор дописів посвяченых забыткам. Віце-ведучий Стоваришыня Разом для Білобок, член Стоваришыня Маґурич. Занимат ся документацийом і консервацийом забытків, історийом штукы, іконоґрафійом забытків Підкарпатя. Єст спілорґанізатором інвентаризацийно-дослідничых таборів на обшыри пжеворского повіту.

Орґанізатором выставы єст Музей Дворы Карвациянів і Ґладышів в Ґорлицях одділ Мазярска загорода в Лоси з церквом в Бортным. Спілорґанізаторами: Православна Парафія в Бортным, Стоваришыня Розвитку Села Бортне і Бодакы, а партнером проєкту – Одділ Церковной Штукы Музею-Замку в Ланцуті. Проєкт єст реалізуваний завдякы дотациі Міністра Культуры і Народового Дідицтва.