Фінал «Rusyn Cup» і «Руснаковиця» в Братиславі

По долгым часі футбольовых змагань найліпшы русиньскы команды з цілой Словациі вкінци зыйдут ся на великій фінал до Братиславы! Перейти вшыткы етапы турніру «Rusyn Cup» не было легко, прото же цілий цикль змагань тырвал од минулого рока, заохочуючы до участи вельох молодых, здібных Русинів і іх приятелів, котры станули в бою о выграня «Rusyn Cup».

Великій фінал одбуде ся в найблизшу суботу, 23. квітня/апріля т.р., од 13.00 год. в Братиславі. Вступне дармо, зато орґанізаторы тым більше просят до участи фанів футболю, жебы підпорили своіх фаворитів.

Молоды.Русины, котры сут головным орґанізатором цілого турніру, зрыхтували для участників (так тых граючых, як і обзераючых) іщы єдну подію. На тот раз – барже розрывкову і ґу тому, жебы посвяткувати перемогу в великым фіналі. Буде то добрі знана русиньскій молодежы на Словациі – «Руснаковиця», котра зачне ся ок. 20.00 год. в Клюбі Елям (Млиньска Долина). Вступне на забаву то 2 евро, а про добру музыку під ногу постарат ся, як все, радийо русин.фм.

Третій річник «Rusyn Cup» выстартувал осіню минулого рока і згідні з заповідями кінчат го фінальны розгрывкы на яр т.р. в Братиславі. Тогорічна едиция турніру «Rusyn Cup» была дакус інча од двох минулых, прото же до змагань приголосило ся більше місцевости, в котрых жыют Русины, м.ін. спомнена уж Братислава, Кошыці, Пряшів, ци Нітра.