Фіґлі за 125 міліонів доларів

Меджі людми з бывшого выходного блоку доднесь бісідують ся фіґлі о Радію Єреван. Траґічным є, же україньска верзія Радія Свобода довгодобо робить вшытко про то, жебы молодша ґенерація, котра уж жарты з прославленым радіом не знать, зачала бісідовати фіґлі якраз о бывшім сімболі слободы.

Україньске Радіо Свобода довгодобо давать простор людям, котры не роблять на порталі нич інше, лем все, як є ку тому принагода, копнуть до Русинів, фалшують історію, докінця хоснують лож як робочу методу.

Кедь єм на то давніше звернув увагу, головно в повязаню з коментарями Олександра Гавроша, а озвали ся ку тому і америцькы Русины, кедьже і з їх грошей є фінанцоване тото радіо, в україньскій редакції то вырішыли барз скоро.

По перше, акцентовали, же статі Гавроша і йому подобных суть в рубріці Точка зору, і так то не репрезентує погляды редакції. Тото речіня зачали давати і під статі в даній рубріці. Навеце, жебы собі змыти рукы, Гаврош вже не быв підписованый як співпрацовник радія. І тым то скінчіло. Гаврош і йому подобны далше діставають простор на писаня протирусиньскых памфлетів, бо слобода прояву.

Проблемов є, же арґументованя з рубріков Точка зору, і з тым, же то не погляд редакції, преставать быти достовірне, покля ся подобны антірусиньскы заміряны тексты найдуть в інформачнім сервісі. Од того уж ся редакція не може діштанцовати, кедьже тот сервіс робить якраз она і робітници той редакції.

А правда така, же на порталі споминаного радія не мож найти нич позітівне о Русинах в жадній рубріці, все ся вытігать лем кедь має хтось проблему зо законом, давать ся простор лем тым, котры о Русинах пишуть в неґатівных конотаціях.

Пару днів тому україньске Радіо Свобода принесло статю, котра была о тім, же на Словакії зачало списованя людей. Статя приносить фактоґрафічны хыбы. Наприклад о тім, же словацька презідентка Зузана Чапутова была проти другого вопроса о народности, што не є правда, або же Чехы были подля перепису із 2011-го року третьов найвекшов меншынов на Словакії, што так само не є правда.

Окрім того в статі найдеме, не знам то іншак повісти, досправдове перекручаня фактів, жебы то пасовало україньскій пропаґанді. Русины, котры были реално треті найвекшы на Словакії, але Радіо Свобода їх дало аж на четверте місце, суть означены як „історічна назва Українців, котра ся вжывать і днесь на Закарпатю“. Радіо Свобода замовчує факт, же україньска меншына є окремов од русиньской, а то нелем на Словакії, але і в далшых державах, і же тота меншына ани здалека не мала чісла такы, як Русины або споминаны Чехы. Просто чісло Русинів в списованю непрямо приписали собі.

На кого ся буде теперь выгваряти редакція радія і порталу? Перешмарять статю до рубрікы Точка зору? Якбач тяжко, кедьже є то в класічнім інформачнім сервісі, і обсягує то нелем фактоґрафічны хыбы, але прямо дезінформації, лож, котра є знову прямена на єдну меншыну.

Без огляду на выгварькы, редакції україньского Радія Свобода бы мали дати прочітати собі свій властный кодекс, котрый на сайті мають.

В тім кодексі дочітаме ся, же журналісты Радія Свобода мають робити вшытко можливе, жебы забезпечіти фактічну точность. Де є тота точность в тій статі? Так само ся дочітаме, же проґрамы і статі мають мати рівноважный тон. Де є тот тон, коли Русины в Радію Свобода не діставають простор на свою оборону, лем ся до них копать? Радіо Свобода одкликує ся на людьскы права, підтримує, подля свого кодексу, право вшыткых народів до самовызначіня. Як го підтримує, кедь говорить о Русинах як о Українцях? Кебы прочітали цілый свій кодекс, може бы пришли на то, же кажде друге речіня, кедь не веце, давно не є платным про україньску редакцію радія.

А уж тяжко коментовати факт, же Радіо Свобода у вшыткых країнах, де высылало або высылать, там высылало зато, жебы підпорити демократічны силы, жебы конштруктівно крітіковати і давати дзеркало властям, лем в припаді україньской редакції мі то прийде як інштрумент пропаґанды самых україньскых властей. Радіо не звертать увагу на проблему невызнаной меншыны, радіо до той меншыны вєдно з далшыма рыє.

Є ясне, же америцькы гражданы, з котрых грошей є плачене Радіо Свобода, на 99,99 процент не знають абсолутно нич о тім, як фунґує його україньска редакція. Але фактом є, же наприклад на минувшый рік мав цілый проєкт – вшыткы окремы высыланя, довєдна бюджет в сумі майже 125 міліонів америцькых доларів. Кедь вдяка україньскій редакції раз люди будуть бісідовати фіґлі о Радію Свобода, пак буде треба сконштатовати, же в поріваню з Радіом Єреван є тото аж барз дорогый гумор.

Першый фіґель бы єм уж і мав. Звідають ся Радія Свобода: Є можлива досправдова демокрація на Україні? Радіо одповідать: Є, але нашто бы нам была?

Є предці знаме, же з демократічных держав Радіо Свобода одходить. Хто бы пак платив і годовав пропаґандістів з україньской редакції в Празі?

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА