«Феномен Бескідів»: Фотоґрафічне пізріня на святыні – субота, 14.00 год.

Запрашам до выслуханя девятнадцетого одтинка проґраму з циклю «Феномен Бескідів – деревяны церкви і костелы» зреализуваного в рамках творчой стипендиі Міністра Культуры і Нацийональной Спадковины.

В проґрамі пн. «Фотоґрафічне пізріня на святыні» Каміль Палюшек буде оповідал про своє долголітнє заінтересуваня сакральном, деревяном архітектуром церкви возношеных столітями через Лемків. Нашы храмы незмінні являют ся інспірацийом для розмаітых артистів, творців, пасийонатів ци любителів. Каміль Палюшек затримує іх красу на вынятковых фотоґрафічных кадрах. Єст він абсольвентом Выділу Штукы Ряшівского Університету, жыє і робит в Ряшові. Єст запаленым роверистом і любительом близшых і дальшых подорожы. Фотоґрафійом занимат ся од вельох років, а головным мотивом сут церкви – іх брыла, зовнішня форма і місце в просторі. На ровері обіхал уж велику част обєктів, якы находят ся на Пути Деревяной Архітектуры. Своі роботы презентує головні через порталі социяльных медий – а то фанпейдж під назвом Cerkwie на сайті Facebook та профіль cer.kwie в сервісі Instagram. Оба місця громадят в сумі пару тисячів любителів Камільовых знимок і його пізріня на деревяну сакральну архітектуру.

Премєра субота 24. липця/юлия 2021 р. о 14.00 год., повторіня в четвер 29. липця/юлия 2021 р. о 16.00 год.

Zrealizowano w ramach stypendium Ministra Kultury i Dziedzictwa Narodowego.