Фелікс Мендельсон, «З повагом», просит Павел Малецкій – неділя, 20.00 год.

Німецкій композитор, дириґент, піаніста – Фелікс Мендельсон. Походил з богатой жыдівской родины. Його родиче утримували чысленны контакты з представниками німецкой інтеліґенциі і творчых середовиск. Молодый Фелікс дозрівал в творчій атмосфері.

Вчыл ся Фелікс Мендельсон (1809-1847) грати на гушлях і фортепіані початково під оком матери, пак – черговых педаґоґів, а в 1819 році, вєдно з так само талановитом сестром Фанні, під оком Карля Зельтера, якого уважали за найліпшого музичного учытеля в Берліні. Протягом наступных місяців скомпонувал парудесят творів, м.ін. 6 симфоній на камеральну оркєстру, комічну оперу.

Першый публичный концерт дал, як мал девят років, першы композициі опубликувал як тринадцетлітній хлопчыско. Уважают го за чудову дітину музикы зараз по Моцарті. На сімнадцет років скомпонувал свій найбарже знаный твір – концертову суіту до «Сну літньой ночы» Шекспіра, котрой фраґмент называют «Весільным Маршом». Подорожувал по Шотландиі, Італиі, а інспірациі з тых місц переносил до творів. Разом Мендельсон скомпонувал пят симфоній, а тіж фортепіановы і гушльовы концерты та ораториі.

Вмер барз молодо, на 38 років. Під конец жытя терпил на депресию спричынену м.ін. смертю сестры Фанні (выдатной піаністкы).

В проґрамі почуєте м.ін. ІІІ симфонію а-мінор «Шотландску» оп. 56 ци IV симфонію а-мажор «Італияньску» оп 90. Буде і «Сон літньой ночы».