Европейскій Трибунал Справедливости за охороном меншыновых языків

Европейскій Трибунал Справедливости (анґ. Court of Justice of the European Union) розсудил, што ініциятива Minority SafePack входит в обшыр компетенций Европейской Уніі. Вырок был выданый в справі заскаржыня ініциятивы через Румунію.

То важне рішыня, кєд же навысшый европейскій суд потвердил єднозначно, што власти Европейской Уніі мусят заняти ся зголошеном ініциятивом, бо єдном з задач Евросоюзу єст м.ін. охорона нацийональных і етнічных меншын.

Меншыны гором

В рамках Европейской Соспільной Ініциятивы громадяне мают право зголошувати своі пропозициі правных реґуляций. Треба лем зобрати што найменьше 1 мілийон підписів з четвертой части з 27 держав входячых в склад Европейской Уніі. Як раз думкодавці ініциятивы Minority SafePack в квітни/апріли 2018 р. зобрали 1,1 мілийона підписів. Од початку проєкт підтримує Федерацийный Союз Европейскых Народів (анґ. Federal Union of European Nationalities) та дальшы меншыновы орґанізациі і плятформы.

Minority SafePack была першый раз запропонувана в 2013 р., але Европейска Комісия (выконавчый орґан Европейской Уніі) одмовила реґістрациі ініциятивы, арґументуючы рішыня тым, же зголошены меншыновы пропозициі не входят в обшыр компетенций Евросоюзу. Уж товды орґанізаторы меншынового пакєту дали в суд выконавчый унійный орґан і конец-кінцьом выграли, кєд же суд першой інстанциі ствердил, што Комісия не представила доказів на тото, же ініциятива Minority SafePack повинна быти одшмарена. В 2017 р. Комісия остаточно заакцептувала проєкт.

Вкінци Румунія подала скаргу на Люксембурґ о забльокуваня ініциятивы. Як арґументы представила тото, же Европейска Комісия не мала компетенций до предложыня правных пропозиций Minority SafePack до розсмотріня Европейскому Парляментови. Як раз в Румуніі ініциятива Minority SafePack зобрала аж 225 тисячів підписів, головно серед мадярскоязычных жытелів Трансильваніі і ромской меншыны, котра надале стрічат ся з переслідуванями.

Суд низшой інстанциі одшмарил арґументы Румуніі в 2019 р., але Букарешт подал апеляцию (головно вказуючы на процедуральны квестиі), в котрій твердили, што суд не позволил властиво омовити справу. Вкінци в выроку выданым в четвер, 20. січня/януара 2022 р., Европейскій Трибунал Справедливости oстаточно потвердил, же Европейска Комісия могла в рамках своіх компетенций піднимати рішыня што до Minоrity SafePack.

Minоrity SafePack

Minority SafePack то ініциятива, котра має ґарантувати вшыткым языковым і нацийональным меншынам в Европі высокы стандарды хороніня іх прав, достоменности, підтримуваня культуры і вшелеякых аспектів штоденного жытя – так членів приналежачых до меншын, як і орґанізаций, котры в меншыновым просторі діют і еґзистуют.

«То важне і заохочаюче для інчых, што суд консеквентно оддавал нам справедливіст в обшыри меншыновых прав та промуваня культуровой і языковой ріжнорідности» – повіл в освідчыню выданым по выроку ведучый Федерацийного Союзу Европейскых Народів.

В 2020 р. орґанізаторы ініциятивы выслали просьбу до Европейской Комісиі о розсмотріня іх девятьох постулятів. Дві треті Парляменту заголосували за громадяньском ініциятивом. Єднако в січни/януарі 2021 р. Комісия зас одмовила підняти дальшы діяня, подаючы, што пропонуваны розвязаня были уж в більшости окрислены в інчых правных актах Европейской Уніі. Описуваный вырок потвердил єднозначно, што од початку правду мали представникы меншыновых постулятів.