Евробанковкы з танками в Долині смерти ся выпродали за два дні

Компанія Euro Souvenir Slovensko у співпраці із селом Кружльова выдала тот рік сувенірову евробанковку, якой вартость є 0 евр, і на котрій суть выображены танкы в Долині смерти.

З продаваньом зачала Кружльова 6-го децембра 2021-го року, но уж по двох днях были зберательскы евробанковкы выпроданы. Компанія выдала із „дукляньскых“ евробанковок 4000 фалатків, плус 1000 фалатків з придрукованым написом anniversary 2020.

На 0-евровім сувенірі є выдрукованый Памятник чехословацького армадного корпусу і сімболіка ТАРАН, што означує способ борьбы, кедь до себе наражають шыфы або іншы транспортны бойовы средства. На споминаній банковці є танк Т-34/85 вклиненый до німецького танку Panzer IV Ausf. J.

Тот самый образ мож в реалности видіти і в Долині смерти, де проходила Карпато-дукляньска операція. Друга сторона сувеніровой банковкы є така сама, яку мають вшыткы евробанковкы.

Продаваня зачало 6-го децембра рано, но уж почас попереднього вікенду мав староста Кружльовой Адріян Ґажо што робити, інформовали Піддукляньскы новинкы. Через вікенд подля новинок пришло старостови коло 70 імейлів і мав коло сто телефонатів. Вшыткых інтересовала евробанковка. Робітници сельского уряду мусили наконець такой по двох днях выбавити понад 2000 коперток із купленыма сувенірами.

Зберательскы евробанковкы ся продавали за три евра, але пізніше ся звыкнуть продавати і за десяткы ці стовкы евр. Інтерес о „дукляньскы“ банковкы быв величезный, а не хотіли їх лем зберателі, але і люди зо села ці з піддукляньского реґіону.

Кружльова довгодобо будує свій турістічный рух на пропаґації Карпато-дукляньской операції. Як повів староста Ґужо, по евробанковках мають і далшы планы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА