«Бескід без кіту» – премєра пєсы в Мазярскій Загороді в Лоси

Премєра спектаклю молодіжньой театральной ґрупы з Устя Руского «Бескід без кіту» пройде 14. серпня/авґуста. Артисты запрезентуют ся в спектаклю, котрый возник на основі книжкы «Бескід без кіту».

В проєкт заанґажувало ся вельо осіб з околиц Устя і не лем. Театральном опікунком ґрупы і авторком сценария єст Моніка Бабуля, о музичну оправу задбал Мирослав Боґонь, а вокально рыхтує ґрупу Юлия Дошна, котру так само буде можна видіти на сцені. В проєкт заанґажувала ся тіж сама авторка книжкы – Мария Стшелецка. Як підкрислила Марлена Мозьдзіньска, координаторка цілого проєкту, акция єст орґанізувана завдякы підпорі війта ґміны Устя Рускє, Збіґнєва Людвіна, але тіж завдякы тым, котры підтримали інтернетову колекту.