Експозиция церковных памяток в Музею Русиньской Культуры в Пряшові

Музей Русиньской Культуры в Пряшові, котрий є одділіньом Словацкого Народного Музею як головны задачы має статутово записаны: досліджаня, громаджыня, забезпечаня, консервацию і удоступняня для публикы проявів материяльной, соспільной і по части духовой культуры Русинів. Днес актывніст пряшівскых музейників зосереджат ся на документуваню русиньского ремесла, мистецтва і культурных памяток на Словациі, хоц декляруют они заінтересуваня пошырюваньом музейного збіркового фонду о артефакты і памяткы з інчых держав, котры заселяют Русины. Музей Русиньской Культуры в Пряшові то єдна з професийональных інститиций, плекаючых русиньску культуру на Словациі. В Польщы неє ани єдной лемківской інституциі культуры, хоц інчы меншыны (жыдівска, кашебска, литовска, німецка) своі інституциі мают.

В проґрамі “Пропаґанда” запрашам на стрічу з директорком Русиньского Музею – паньом Ольгом Ґльосіковом. Днес пані директорка опровадит нашых слухачів по двох музейных ізбах. В першій находит ся одкрыта 1. червця т.р. выстава макєт деревяных храмів авторства Ладислава Цідилы з Бардийова. Вшыткы презентуваны моделі церкви сут побудуваны в мірці 1:50, зато мож порівняти кажду з них і однести до інчых. Експонаты сут сконструуваны з годинарском точністю. Заміщено в них деталі, як маленькы дзвоны в церковных вежах, ци ювілерной подобы кресты.

В другій ізбі презентуваны сут памяткы церковного походжыня, в тым чыслі перший выдрук Євангелиі, тлумаченой на русиньскій язык, а дале іконы, кресты, і літургічний одяг.

На другу стрічу в інчых просторах Музею Русиньской Культуры в Пряшові запрашам о тыжден.

Пониже фотоґрафіі експонатів, про котры буде бесіда в першій части проґраму.