Дзюбинівка з Ґладышова номінувана. Потрібны нашы голосы

Лемківска Едукацийна Загорода Дзюбинівка з Ґладышова перешла перший етап конкурсу «Великє Одкрываня Малопольщы», тым самым закваліфікувала ся до дальшой части змагань. Загорода успішні перешла повітовий етап, отримуючы найбільше чысло голосів. Тепер тырват борба на воєвідскым рівни. 

18. едиция конкурсу «Великє Одкрываня Малопольщы» пропонує стартуючым пару катеґорий, в якых можут бороти ся о нагороды. Лемківска Едукацийна Загорода стартує в катеґориі «Туристична Атракция Рока». Воєвідскій етап голосуваня тырвал буде до пятниці, 8. вересня/септембра т.р., до 21.00 год. 

«Краківска Ґазета» шторік орґанізує плебісцит, в котрым заохочат своіх чытачів одкрывати голосуваньом найкрасшы і найліпшы туристичны атракциі Малопольщы. Завдякы тому малопольскє воєвідство є зачыслане до єдного з найчастійше одвиджаных куточків Польщы. Oрґанізаторы выокремили пару ґруп, в рамках котрых мож оддавати голосы, адже голосувати мож на дакє шумне місце, найліпшу туристичну атракцию, подію в реґіоні, смачну і традицийну корчму, готелі, аґротуристичны ґаздівкы та на особу – туристичного провідника. В каждій з едиций конкурсу находят ся і деякы акценты шырше-узше звязаны з Лемками і Лемковином. В тым році маме нагоду оддати свій голос як раз на Лемківску Едукацийну Загороду Дзюбинівку з Ґладышова. 

Дзюбинівка то не лем Лемківска Едукацийна Загорода, але самособом аґротуристика. Великом атракцийом для одвиджаючых Низкій Бескід являт ся старий одреставруваний комплекс лемківской забудовы. Складат ся він з хыжы, двох сыпанців, вітровых млинів, студні з журавльом та кєрату. В середнині обєктів находят ся ориґінальны, забытковы нарядя і ґратя, якы сут не лем выставляны, але і хоснуваны вчас варштатів, на якых беручы в них участ мают примірні можніст «бити» леняну оливу методом сперед 100 років. В загороді родины Дзюбинів Стоваришыня «Руска Бурса» з Ґорлиц орґанізує молодіжны таборы, на якых лемківскы діти і молодіж познают жытя на давній лемківскій ґаздівці.

ГОЛОС НА ДЗЮБИНІВКУ: СМС на но. 72355 o змісті WOMAT.51

Гев находят ся результаты голосуваня.