Джон Ноульз Пейн, «З повагом» – просит Павел Малецкій – неділя, 20.00 год.

Джон Ноульз Пейн (1893-1906) был американьскым композитором, орґаністом і педаґоґом. Компонувал оркєстровы творы, вокально-інструментальны, камеральны, кантаты, сценічны творы ци соловы пісні.

Початково творил в клясичній стилистиці, з часом його музика набрала драматичности, поглубліня выразу, достерігальне стало ся влияня Шумана, Ваґнера ци Мендельсона. В орґановій музиці взорувал ся на творчости Баха. Творы Пейна характеризуют ся розвинутом хроматиком, реґулярном метриком, фіґурацийном мелодиком і звучыньом о богатій кольористиці. Был першым американьскым композитором, котрый написал ораторию.

Отец Джона Н. Пейна вюл музичный склеп і дириґувал ансамбльом в Портлянд. Молодый Пейн студиювал в Берліні, але осіл в Бостоні, де грал в єдным з костелів як орґаніста і вюл педаґоґічну діяльніст. В 1862 році остал выкладовцьом Гарвардского Університету. Його стараньом утворили гын першу в ЗША катедру музикы. В 1875 році остал єй професором.

Діял як орґанізатор музичного жытя, гостинні выкладал на вельох учельнях. Вюл і концертову діяльніст як солиста і член чысленных ансамблів.