Джаред Лето як Енді Варголь

Американьскій актор, лавреат нагороды Оскара, Джаред Лето остал головном звіздом фільму пн. Варголь. Сценарий до фільму напише Теренс Вінтер.

Джаред Лето заграт Енді Варголя в новым біоґрафічным фільмі о артисті. Актор, якого остатньо мож обзерати в роли Джокера в фільмі Леґіон Самовбивців (Suicide Squad), буде тіж спілпродуцентом фільму пн. Варголь, оповідаючого про жытя піонєра поп-арту.

Автор сценария новоповстаючого фільму, Теренс Вінтер, єст ріж автором тексту до знаного фільму Волк з Вoльстірт. Основом сценария фільму Варголь буде книжка авторства Віктора Бокріса, печатана два рокы по смерти короля поп-арту, під наголовком: Енді Варголь: Біоґрафія (книжка доступна єст до почытаня в Бібліотеці Руской Бурсы).

Енді Варголь был єдном з найважнійшых осіб нюйоркского світа штукы, ментором вельох узнаных артистів, в тым Жан-Мішеля Баскія, выдатного представника неоекспресийонізму. Варголь, называний корольом поп-арту, был артистом, котрий замінил баньку помідоровой зупы і фляшку популярного ґазуваного напитку в діла штукы, вартаючы мілийоны дулярів. Славу принесли му тіж портреты звізд, якы творил при хоснуваню технікы серіґрафіі. Одкрыто признавал ся до гомосексуальной орієнтациі, в часі, коли в Америці была то іщы тема табу, а гомосексуалізм постеріганий был як психічна хворота або переступство. Не смотрячы на світовий успіх, терпіл на іпохондрию.

Джаред Лето, якій заграт великого Енді, за ролю ґея в фільмі Витай в клюбі был нагороджений Оскаром. Роля тота, окрем нагороды, принесла критику і дискусию зо стороны гомосексуальных середовиск, односячу ся до того, ци особы гетеросексуальны винны грати такых геороів. Актор признає, же гомосексуальны акторы не мают такых самых можности в Голивуд, як гетеросексуальны, але не повинно мати значыня, якой орієнтациі єст дана особа, а лем тото, ци знат заграту конкретну ролю.

Продуцентом цілости буде Майкель Де Лука, якій выпродукувал м.ін. фільмы Социяльна Сіт ци Капітан Філіпс. Не знатя іщы, хто вырежысерує фільм Варголь.