Дві «Бесіды»? То можливе…

Часопис Стоваришыня Лемків – «Бесіда» святкує свій ювілей. В тых днях вышли вынятково два номеры часопису: дальшый – ч. 5 (200) за місяці вересен/жолтен 2024 р., та принагідный, ч. 200А.

В реґулярным номері прочытаме м.ін. статі:

• Петро Медвідь, Зачал выходити новый часопис Карпатознавстсво;
• Наталия Малецка-Новак, Замениці прозвучали голосом Лемків;
• Севериян Косовскій, В Вафці посвятили Пропамятный Крест;
• Петро Трохановскій, … І памят іх в род і род;
• Севериян Косовскій, Справа Акциі «Вісла» вертат. ІНП буде мусіл наново заняти ся темом выселіня Лемків і Украінців; 
• Севериян Косовскій, Ватра інчых поколінь;
• Наталия Малецка-Новак, Одышол Богдан Карел, артиста лемківской різбы;
• Петро Трохановскій, Співай, Юрку, і в Небі;
• Петро Медвідь, Kasigarda є місце, де мож дотулити ся і «нашой» Америкы (2). 

В тым чыслі, окрем основных новин з русиньского світа за послідні два місяці, можеме чытати і пару выімків дописів з польскых і словацкых ґазет.

Редакция часопису і Головный Заряд Стоваришыня Лемків склали желаня ведучому СЛ Андрийови Копчы з нагоды його ювілею 70. народин.

З давной і сучасной русиньской творчости можеме чытати продолжыня оповіданя Симеона Пыжа – Ґорлицкій бурсак (4). Першы дни в Талергофі. Є тіж четверта част оповіданя – авторства Великосхымника Ананія (Русиняка) під назвом Мы ся іщы вернеме. В части «Одышли од нас / Попращали мы» чытаме споминовы слова о членкынях Стоваришыня Лемків – бл. п. Яніні Дзядик і бл. п. Аллі Возняк.

Як сме уж інформували, од чысла липец/серпен (199) вернуло фінансуваня часопису Міністерством Внутрішніх Справ і Адміністрациі. З той тіж нагоды, же як раз зышло ся гевсе з выданьом округлого чысла – редкация підготовила і принагідне выданя, котре припоминат нам тото, што мож окрислити як важне, цінне, цікаве.

«Дотацию признано акуратні од марцьово-квітньового номера, поминяючы выданый з власных середків січньово-лютовый номер. І вшытко виділо бы ся лоґічным, кєд бы не наказано выдати… шестьох номерів. Загвоздка в тым, же ани в переступным році не бывают – дайме на то – два вересні. В тій ситуациі ничого інчого не мож было выдумати, як лем выданя принагідного номера. Нагода трафила ся щестливі, понеже на вересен-жолтен выпадало выданя 200-го номера Бесіды, што прикликувало спомины, аж і ностальґію. Похоснувано отже архівальны примірникы часопису, припомнено час, подіі, котры припоминати треба» – пояснює во вступі головный редактор Петро Трохановскій.

Прото, што сут то архівальны дописы, не будеме ту прикликувати іх полных наголовків. Більшіст з них тыкат істориі і «жытя» Стоваришыня Лемків, найважнійшых моментів за остатніх 35 років. Возте в рукы оба номеры і сміло чытайте.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда», годны сте придбати в електронічній версиі на сайті www.stowarzyszenielemkow.pl.