Дубайовы в Музею русиньской културы в Пряшові

Як інформовала Яна Трущіньска із Словацького народного музея – Музея русиньской културы в Пряшові (СНМ-МРК), музей приготовлює выставку під назвов Дубайовы – Анна і їй діти.

Концепція выставкы, котра буде одкрыта 4-го юна 2021-го року о 16.00 год., обсягує выбер із творчости Михала і Ореста Дубайовых, найстаршого і наймолодшого із семох сородників, але і особны річі а оцініня вшыткых семох дітей, а так само артефакты і публікації з творчости їх дітей, внуків, внучок.

Михал і Орест Дубайовы

Михал Дубай (рр. 1910 – 1993) быв малярьом, котрый мав вызначну културотворчу роль в Пряшові. Брав участь на основаню научной бібліотекы, де быв і директором, Україньского націоналного театру (днесь русиньскый Театер Александра Духновіча, Музея україньской културы у Свіднику, а робив і в области памяток, як педаґоґ, редактор, публіціста і културный робітник.

Наймолодшый брат Орест (рр. 1919 – 2005) быв ґрафіком, малярьом, скулптором, ілустратором і вызначным педаґоґом. Быв ректором Высокой школы вытварных  умень в Братіславі і народным умелцьом Чехословацькой соціалістічной републікы.

„Тоты дві найвызначнішы поставы родины Дубайовых до даякой мір затінили значіня остатніх членів родины. Но выставка Дубайовы – Анна і їй діти в СНМ-МРК в Пряшові є присвячена цілій родині Дубайовых, од основателів, Дезідерія і Анны, аж по їх внуків і правнуків,“ інформує Трущіньска.

Історія родины Дубайовых

Дезідерій Дубай і його жена Анна, роджена Калинякова, были родічами семох дітей, котры ся народили в Гачаві, в окресі Рожнява, і в селі Велика Поляна, в окресі Снина, котре вже днесь не існує. Михал быв найстаршый, пак мали Дезідерія, Павла, Марту, Ладислава, Анну і Ореста.

Дезідерій Дубай быв ґрекокатолицькым священиком, котрый одышов за море і вернув ся, кедь мав Орест 16 років. Домів заганяв грошы, котры мала жена схосновати на накупліня фундушів, но она з грошей заплатила высокошкольскы штудії про вшыткы свої діти.

„Векшына дітей досягла в дорослім жывоті вынятковы выслідкы – окрім Михала і Ореста – сын Ладислав заслужыв ся о розвиток Інштітуту лікарьской мікробіолоґії в Кошыцях, в области медициньской освіты і научно-бадательской роботы як професор медициньскых наук і декан Лікарьской факулты Універзіты Павла Йозефа Шафарика,“ інформує музей.

Малярьскый талент здідили сынове Ореста, Павла, але і дакотры їх внуци і внучкы. Вецеро внучок стало продуктівныма высокошкольскыма педаґоґами з богатов публікчанов діялностьов.

Родинна выставка Дубайовых буде про навщівників русиньского музея в Пряшові приступна до 4-го октобра 2021-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА