Другым віцепріматором Пряшова став Петро Крайняк

Місто Пряшів по октобровых комуналных выборах вже має в уряді нового пріматора Франтішка Ольгу, а новый склад містьского заступительства уж має за собов і перше робоче засіданя.

В середу 30-го новембра 2022-го року публіковало місто на своїм офіціалнім сайті на сіті Facebook інформації о тім, же Пряшів уж має потвердженых своїх двох віцепріматорів. Першым віцепріматором міста Пряшів став Ріхард Друтаровскый, котрого собі выбрав пріматор, кедьже кандідовали у выборах в тій самій коаліції партій і їх клуб є найвекшый в пряшівскім заступительстві.

На посаді другого выцепріматора быв потвердженый Петро Крайняк, котрого номіновав посланецькый клуб Hlas-SD – незалежны – SZÖVETSÉG – ALIANCIA.

Петро Крайняк є познатый межі Русинами з нашого возродного руху. Його стрыком є отець Франтішек Крайняк, ініціатор перекладів русиньскых літурґічных текстів, в русиньскім русі довгодобо анґажує ся і його отець Петро Крайняк старшый, за професійов правник.

Новый другый віцепріматор абословав Середню лісницьку школу в Пряшові. По закінчіню основной воєньской службы продовжовав штудовати на Ґрекокатолицькій теолоґічній факулті Пряшівской універзіты в Пряшові.

Пять років учів на основній школі в селі Свинія. В роках 2012 аж 2013 робив на Уряді уповномоченого влады Словацькой републікы про народностны меншыны в Братіславі. В роках 2016 аж 2020 быв державным секретарьом Міністерства школства, наукы, баданя і шпорту Словацькой републікы.

На тій посаді намагав ся, жебы школьске навчаня русиньского языка розшырило ся в нашых реґіонах.

Од 2010-го року без перервы є посланцьом містьского заступительства в Пряшові за выборчій округ Соливар, Сольна Баня, Швабы. В роках 2013 аж 2017 быв і посланцьом Пряшівского самосправного краю.

Од початку існованя мултіетнічной партії Most-Híd, основаній на гражданьскім прінціпі, быв їй актівным членом і фунцкіонарьом. По злучіню мадярьскых політічных партій, включно Most-Híd, до єдного субєкту SZÖVETSÉG – ALIANCIA, став членом той партії, в рамках платформы Most-Híd.

Петро Крайняк окрім іншого є і публіцістом. В реґіоналній, народностній і церьковній пресі публіковав понад 200 статей а выдав штири властны публікації.

Довгы рокы быв актівным і в русиньскім русі а в русиньскых орґанізаціях. Так само є знамый тым, же му залежыть на сохраніню гробів вызначных русиньскых особностей, быв при неєднім одкрываню памятных табліць вызначным Русинам, быв і їх ініціатором.

В рамках меджінародной научной конференції з назвов 20 років высокошкольской русиністікы, яка проходила у 2018-ім році в Пряшові, Петро Крайняк быв, окрім іншых, нагородженый Премійов імени Кіріла Методія за розвиток русиньского языка.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА