Др Богдан Горбаль – на многы і благы літа!

27. жолтня 1965 рока в Сьцінаві над Одром на Нижнім Шлеску, вродил ся Богдан Горбаль – історик, дослідник і автор вельох науковых і популярных статій, дописів і книжок. Його родиче были выселены в «Акциі Вісла» з Лемковины – з Бортного і Мушынкы. «На заході» Богдан Горбаль найперше вчыл ся в ліґницкых школах, а дальше студиювал в Вроцлаві. По скінчыню історичных студий, оборонил докторат на Вроцлавскым Університеті, потім іщы – бібліотекознавчы студиі в Квінс Коледж (Queens College in New York City). Днес робит в Нюйоркскій публичній бібліотеці і фурт публикує по анґлицкы, польскы і, предовшыткым, в лемківскым языку.

Богдан Горбаль зачал друкувати своі лемкознавчы дописы в 80. роках ХХ ст. за студенцкых часів, в незалежных (некомуністичных) выдавництвах. В «Голосі Ватры» в 1988 році опубликувал допис про Руску Народну Республику Лемків, а дале інчы статі в підземных антикомуністычных выдавництвах. Діял в антикомуністычным «NZS» (Незалежне Здружыня Студентів) в Вроцлаві. Особисто цінил єм си товариство Богдана Горбаля в часі туристычных рейдів по Лемковині і спільній участи в першых «Лемківскых Ватрах». Долгы бесіды і співы при ватрі, довєдна з чысленныма студентами – Лемками, котры радо вандрували през рідну землю і познавали єй історию просто од єй свідків – як напр. мало то місце в діда в Чырній, Высовій ци Кракові.

Краківскы і вроцлавскы студенты довєдна активні і ясно оповідали ся за автономічныма і честныма рішынями в лемківскых справах. Товды, в 80. роках, вчыли ся они обставати твердо при своіх русиньскых прикметах. Боронили «Лемківской Ватры» пред пробами завлащыня єй през єдну, украінізаторску – антилемківску, нацийоналістычну ідеолоґію. Остатньом, котру (довєдна з возаками з Білянкы) сме охоронили пред перенятьом през Украінців з комуністычного УСКТ, а пак іх спадкоємців з Объєднаня Лемків, была тота в 1989 році  в рідным селі Горбалів – Бортным.

Богдан Горбаль то вызначний історик і лемківскій соспільний діяч. Днес, Богдане, приймий найщыршы желаня од редакциі і од слухачів радия Руской Бурсы ЛЕМ.фм., на многая і благая літа!

Богдан Ґамбаль

Спис выбраных дописів і публикаций Богдана Горбаля заміщений є на портали lemko.org.