Дотациі МВСіА – признаны! 2,2 мілийона злотых (ок. 500 тис. €) для Лемків в 2016 році.

Рішыньом з дня 15. грудня/децембра 2015 р., Міністер Внутрішніх Справ і Адміністрациі, т.є. шеф ресорту, під котрым по орґанізацийных змінах находит ся тепер Департамент Віроісповідань та Нацийональных і Етнічных Меншын, признал дотациі на охорону, підтриманя і розвиток культуровой достоменности нацийональных і етнічных меншын та підтриманя і розвиток кашебского реґіонального языка на 2016 рік. Тото рішыня было представлене вчас 53. засіданя Спільной Комісиі Уряду та Нацийональных і Етнічных Меншын, котре одбыло ся в Варшаві 16. грудня/децембра 2015 р.

Внескы на дотуваня діянь в 2016 р. зложыло 186 орґанізаций і інституций (то при влонишнім чыслі 161 – о 25 більше), з котрых 133 достало дотацию на мінімум єдну внескувану задачу (то о єдну орґанізацию меньше, як влони). Разом, на вшыткы проєкты в 2016 р., буде передане понад 15 мілийонів злотых (докладні 15.576.056 злотых в 2016 р., што при влонішній сумі 15.643.752 зл дає результат невельо меньший).

Част той сумы буде передана орґанізациям, котры зложыли внескы на охорону, підтриманя і розвиток культуровой достоменности лемківской меншыны, выміненой в Уставі з дн. 6. січня/януара 2005 рока Про нацийональны і етнічны меншыны та реґіональний язык як етнічна меншына.

Хоц в роботах над спомненым законом про меншыны (в пояснінях до Уставы) Сойм Польской Республикы ґварантувал вызнати за лемківску етнічну меншыну тоту част лемківской соспільности, котра не чує ся быти приналежна украіньскій меншыні, од долшого часу специфіком признаваня дотаций сут задачы, о котры внескуют орґанізациі, маючы в своіх статутах м.ін. записы о репрезентуваню і охороні інтересів украіньской етноґрафічной ґрупы Лемків, при респектуваню законів Польской Республикы, або інспіруваня вчыня украіньского языка на обшыри, де жыє лемківска соспільніст. Посеред них зас находят ся і такы, котры сут сторонниками, або приналежат до понадреґіональных, меджедержавных федераций, неґуючых істнуваня Лемків, як окремой од буд-якой інчой меншыны, в розумліню польскых законів.

Незалежні од того, внескы о дотациі на охорону, підтриманя і розвиток культуровой достоменности лемківской етнічной меншыны зложыло того рока 15 орґанізаций/інституций (влони было іх 12), з котрых дотацию на мінімум єдну задачу отримат 10 орґанізаций/інституций (зрівнуючы з влонишнім чыслом внескодавців, на заміщеній пониже листі видиме, же тілько, як влони). Кєд посмотриме на суму, котра подля внескуваной ціли має спомочы хоронити, підтримувати і розвивати культурову достоменніст лемківской етнічной меншыны, єст она мінімальні меньша (о 25.514 зл) як влони. На 2016 рік презначене єст 2.182.491 зл (сума на задачы в 2015 р. то 2.208.005 зл), што дає 14,01% вшыткых міністерияльных дотаций. Выділяючы з того част, котру достає украіньска орґанізация Объєднаня Лемків (Zjednoczenie Łemków w Gorlicach), лемківска част дотаций то 12,43%.

Беручы до увагы ціле дотацийне спертя, найбільшым бенефіциєнтом дотаций на 2016 р. єст – другій рік запоряд – Лемківскій Ансамбль Пісні і Танця «Кычера» з Ліґниці, котрий на своі задачы в 2016 р. достане 781.391 зл. Хоц то меньше як влони, з цілой лемківской пулі достане більше як третину буджету признаного лемківскій меншыні, т.є. 35,76% (влони – ок. 44%). Выпереджаючы писма од імени Кычеры, поясняючы причыны отриманя так великой дотациі, інформуєме, же 558.391 зл з цілой сумы на 2016 р. признане єст на другій етап перебудовы і розбудовы будинку ансамблю при ул. Зофіі Коссак в Ліґници, де, як чытаме в приведеным писмі, іщы недавно были там лем «ґріб і вільгіт».

Пониже – процентовий розподіл лемківской части дотаций МВСіА на 2016 р. (выділений кавалец колеса то част, котру достала орґанізация, діюча подля інчых, а часом противных до записів Уставы о меншынах критерий, котры односят ся ґу лемківскій етнічній меншыні).

З другой стороны, кєд посмотриме на процентовe збільшыня дотаций, смотрячы на пропорциі признаных сум в 2015 р. і 2016 р., найвекша зміна, не рахуючы меньшой о понад половину сумы для Стоваришыня Промоциі Лемківской Творчости «Серенча», тыкат Товариства для Розвитку Музею Лемківской Культуры з Зындрановы, котре на 2015 р. отримало міністерияльне спертя 84.000 зл, а на 2016 рік достане 126.000 зл, што дає суму о 50% більшу, як в 2015 р. Пониже представляме сопоставліня сум для поєдных орґанізаций, котры внескували о дотациі на лемківску меншыну (2015 і 2016 р.) з підкрисліньом, же ротацийні признаваны тзв. інвестицийны дотациі того рока достали: другій рік запоряд Лемківскій Ансамбль Пісні і Танця «Кычера» (558.391 зл) і Стоваришыня «Руска Бурса» (99.000 зл). Вказане долов сопоставліня то сума вшыткых дотаций, признаных Міністром Внутрішніх Справ і Адміністрациі на 2016 р. та Міністром Адміністрациі і Цифризациі на 2015 р. на дану орґанізацию.

Полна листа орґанізаций/інституций, котры отримали дотациі на 2016 р., доступна єст на сайті Департаменту Віроісповідань та Нацийональных і Етнічных Меншын МВСіА, але не окрислят она меншын, на котры поєдны підметы складали внескы. Документы на поєдны ґрупы дотаций з выокремліньом меншын находят ся за даныма ниже мотузками:

• Dotacja_celowa (файль pdf),
• Dotacja_celowa_inwestycyjna (файль pdf),
• Dotacja_celowa_media (файль pdf),
• Dotacja_podmiotowa (файль pdf).

Желаме вшыткым орґанізациям і інституциям, котры отримали дотациі на 2016 р., доброго схоснуваня публичных грошів на охорону, підтриманя і розвиток культуровой достоменности лемківской етнічной меншыны.