Дошна, Яра, Мірґа, Бутская, Словіньска

27. грудня/децембра в краківскій Стрефі вызвучат Коляды на пят голосів. Буде то святочне колядуваня по лемківскы, украіньскы, циґаньскы, білорускы і по польскы. Пят жен, пят традиций – стріча на сході культур і на зламі років.

Дорічном традицийом клюбу Стрефа в Кракові є стріча зо спільным колядуваньом. Того рока не може пройти в такій формі як все, але публика буде могла хоц віртуальні быти вєдно з колядуючыма. Выступлят Юлия Дошна, Сусанна Яра, Тереса Мірґа, Свєтлана Бутская та Йоанна Словіньска. Кажда презентує інчу вражливіст і інчый спосіб выражаня ся през музику.

Юлию Дошну в загальнолемківскым середовиску представляти не треба. Співаня є для ней молитвом, внутрішньом потребом, часом конечністю. Є бесідом о Лемках. Інспірує ся народном творчістю. В співі присутны сут чардашовы ритмы, перетіганя, заводжыня. Шырша публика могла почути єй голос в звуковій стежці до фільму Зимна Война П. Павликовского, якій был номінуваный в 2019 р. до нагороды Оскар.

Сусанна Яра то артистка, яка так само міцно вписала ся в русиньскы музичны стежкы. Од років презентує світу м.ін. творчіст П. Мурянкы в своіх авторскых аранжациях, в котрых мож дослухати ся елементів джазу, фольку, сучасной, електронічной ци клясичной музикы. Співат і концертує од дітины, а вродила ся в Почайові на Украіні і там прожыла першы рокы. Aктуальні звязана є зо словацкым ансамбльом Грдза та спілтворит ґрупу S.H.A. [чыт. Ша] вєдно з Ганком Вуйцяк.

Тереса Мірґа то циґаньска поетеса, піснярка, ґітаристка і композиторка. Єст основательком і лідерком ґрупы Кале Бала. Вродила ся і дорастала на польскым Спишы в циґаньскым оселі в Чорній Горі, мешкат гын і днес. Окрем авторскых творів, выконує тіж пісні, якы належат до музичной традициі Берґітка Рома.

Свєталана Бутская є співачком, педаґожком та абсольвентком Выділу Музиколоґіі Московской Консерваториі. Є специялистком в обшыри вельоголосовой церковной музикы XVII i XVIII ст. та сакрального співу. Занимат ся творчом реконстуркцийом давных росийскых і польскых пісен.

Послідньом з артисток, яка запрезетнує ся на краківскій сцені, буде Йоанна Словіньска. То єдна з барже харизматичных осіб на польскій сцені. Любителям музикы етно знана є з репертуару інспіруваного польском і славяньском традицийном музиком, любителям літературной співанкы – з одважных інтерпретаций творів Зиґмунта Конєчного. Є лавреатком вельох фестівалів.

Концерт пройде в неділю, 27. грудня/децембра, о 20.00 год. Позерайте го за тым мотузком.