Допись с Устя Руского, пов. горлицкого

Тым разом наша підредакция сконфіскувала допис єдного ґазды, што ся мудрує і хоче, жебы інчы были такы просвічены як він. Задумуєме ся, ци добру принял тактику. Бо Лемкы не люблят, як ся дахто лем кус выхылит. Бо то пак смотрят на него спід быка. Ліпше тихо сідити.

Єдно треба признати пану зза Гомолі. Дбає він на пулярисы своіх єдносельчан. В корчмі треба лишыти ґрайцаря, а так бы си люде могли посідити на своім і выпити. А окрем того чудує нас, што славне Устя Рускє доднес не має свого народного дому.

Допись с Устя Руского, пов. горлицкого

Я, лемко с Устя Руского хочу помудровати и звернути увагу устянам, а в першой мірі старым и гдеякым молодым газдам. Єст в нашом селі читальня им. М. Качковского, але мі єст жаль, же єст она така бідна и має барз планный будынок.

Сходит ся до ней лем меньша часть молодежи и тота робит, што може, а больша часть старших и молодших нич не робят, а в додаток ище шкодят.

Не пасує устяне на вас, бо Устє Руске єст село центральне и повинно давати приклад другым селам. А у нас як єст? Противно, бо устяне берут примір от другых сел и то от тых, што нич не робят.

В селі Ганчові зачинают будовати народный дом, в Квятоні также, а в Климковці мают уж выбудованый. А у нас што?

Я думам так, же як 70% селян потрафило выбудовати 2 будынкы, то 100% може выбудовати оден будынок.

Мали бы мы где посідити и поговорити о своих справах господарскых и не подперали бы стін Лейбы. Не ждали бы мы на него, коли вам вліє содовой воды задармо до горняти. То єст стыд! А вы того стыду не видите! Так устяне, час уж пробудити ся и подумати о том, што нам найблизше!

Може я вам за остро пишу, але мусите выбачити, бо я такый простый хлоп, як и вы. Долший час думал я над тым. Застановте ся устяне сами, добре вы робите, чи зле.

Лемко из за Гомолі.