Doma Dance Theater – новы формы русиньской експресиі тіла, танця і душы

Што до єдного місця выпродали ся білеты на найновшый показ од Doma Dance Theater. Днешній премєровый показ фільму танця «Мамко Моя Люба» то чергова продукция од Александры Боднарчук, хореоґрафкы і русиньской активісткы в ЗША, основателькы Doma Dance Theater.

Doma Dance Theater то ініциятица, через котру достаєме ориґінальны сценічны і екрановы творы, якы лучат етнічну спадковину Русинів з сучасным танцьом. «Зосереджаючы ся на тілі, як на материяльным, одчувальным обєкті культуры, Боднарчук досліджат звіданя о самоекспресию, спільноту, позбавляня власности та крос-культурну ідентичніст через творы, соловы ци ґруповы» – прочытаме на сайті www.domadancetheater.org

Познайме ближе перформерку, танцюристку, культурну активістку та артистичну директорку Doma Dance Theater – Александру Боднарчук.

Наталія Малецка-Новак: Одкале походиш? Де ся выховувала-с? Ци в русиньскым середовиску?

Александра Боднарчук: Єм карпаторусиньском американьском хореоґрафком і культурном активістком. Вродила-м ся і выховала-м в Пітсбурґу, серед тамтой карпаторусиньской, славяньской американьской соспільности. Была-м членкыньом першого дітячого русиньского ансамблю Славяне в ЗША. Через рокы бытя в ним (2000-2008), уформувала ся в мене глубока любов і міцны односины до мойой спадковины, уж в молодым віку. В 2005 році мала єм нагоду взяти участ в европейскым турне ансамблю Славяне по Словациі, Польщы і Украіні, што дало мі можніст першыраз познати землю предків.

Ци важне є для Тебе знати про своє походжыня? Ци має то влияня на Твоє теперішнє жытя?

Тепер мешкам в Мінеаполіс, де находит ся дальша велика і активна русиньска соспільніст. Того рока выстартувала єм з мойом танцювальном компанійом, Doma Dance Theater, што єст місцьом для творіня мойой хореоґрафіі і місцьом для формуваня спільности довкола еволюциі культурной практикы Русинів. Як артистичный директор і хореоґрафка Doma Dance Theater творю ориґінальны сценічны і фільмовы роботы, якы споюют мою етнічну спадковину з сучасныма практиками руху.

Хосную мою русиньску американьску ідентичніст як основу, раму, жебы запрашати артистів з ріжным і ріжнорідным походжыньом до мойого творчого процесу експлоруваня комплементарных тем переміщаня, якы одновляют нарративы довкола нашых діаспор.

Через посильніня мойой етнічной спадковины і досліджаня повязань медже русиньскым досвідчаньом а діаспоричныма соспільностями зо світа, оферую могуче запрошыня до реодкрываня непознаных, невыповідженых історий, што сут в каждым з нас.

Коли зачала-с танцувати і робити тото «на поважні»?

Танцувати зачала-м на 2,5 рока, коли родиче послали ня на лекциі танця, жебы помочы мі ся менше ганьбити. Вчыла-м ся европейскых традицийных танців, влучні з валетом, а тіж славяньскы і балканьскы народны танці.

Скінчыла єм Bodiography Contemporary Ballet’s College Preparatory Program, пак отримала єм ступін бакалавря зо Спектаклю Танцювального і Хореоґрафіі та ступін бакалавря з французского языка на Університеті Огайо. Вчас коледжу, єден семестр была-м в Авіньоні во Франциі, тренувала-м там на Conservatoire d’Avignon під кєрівництвом Cyrille de la Barre. Вчыла-м ся тіж ґаньскых танців і бубнуваня під оком професорок Paschal Yao Younge та Zelma Badu-Younge і была єм членкыньом іхньой ґрупы Azaguno African Dance Ensemble.

Якы были початкы Doma Dance Theater? Є то тіж школа танця? Як рекрутуєш танцюристів? Яка є місия Doma Dance Theater? Ци то реінтерпретация фольклору?

Пару послідніх років думала-м о основаню Doma Dance Theater. Переломным моментом было, коли влоны была єм на Літній Школі в Пряшові. Коли оповідала єм о своій роботі, і же хочу глядати новых можливости продолжаня плеканя нашой культуры і спадковины через танец, то люде барз позитивні реаґували. Барз ня то заохотило, жебы довести Doma Dance Theater з ідеі в реальніст.

Думам, же танец має тоту можніст, жебы помочы Русинам находити і редефініювати нашу власну культурну спадковину, што зас поможе нам продолжати находити себе, нашу соспільніст, хоц може не вшыткы бесідуєме тым самым языком або не жыєме в єдній державі.

Вчас літньой школы мала єм такій красный момент, коли вєдно з інчом участничком школы ішли сме коридором, взявшы ся під рукы, і співали сме разом пісню «Іванку, Іванку». Она была з Хорвациі, я з ЗША, не барз были сме в силі ся доґадати, але получыла нас пісня. То єст як раз тото, о што мі іде, што через штуку, ци то через пісню або танец, можеме ся получыти. То был чудовый момент, котрого николи не забуду.

Doma Dance Theater не єст школом танця, то танцювальна компанія. Твориме танцювальны выступы, перформенсы, спектаклі і фільмы експлоруючы тіло, як автентичне місце культуры. Doma то по русиньскы дома, в себе, плекат серед выконавців і публикы почутя сенсу, приналежности, цікавіст і жарливу експрецию себе. Меджекультурный підхід Doma Dance Theater перекладат ся на міцны сучасны танцювальны творы, котры досліджают спільны пережытя і переселіня ріжных діаспор.

Новых танцюристів доберам через переслуханя. Старам ся, жебы на сали была міцно зріжницювана ґрупа артистів, люде, якы добрі знают і фольклор, і модерный танец.

А як ся Ти подабало на Літній Школі в Пряшові?

Барз ся мі подабало! То было несамовите пережытя, першый раз мала єм нагоду формальні вчыти ся о своій русиньскій спадковині, што дозволило мі дополнити тото, што знам з істориі мойой родины, і того, чого навчыла-м ся будучы в ансамблю Славяне.

Факт, што могла єм быти серед люди, котры знают і люблят нашу культуру, і могла єм з нима бесідувати, был барз інспіруючый.

Знаш дакы русиньскы ансамблі? Подабают ся Ти?

Знам ФА Рутенія – виділа єм іх на Фестівали в Уличы, были чудовы!

Ци сут (або были) дакы славны русиньскы танцюристы в ЗША?

В світі сучасного танця не знам ниякого!

То уж маме – Тебе 🙂

Як буде выглядала днешня подія?

Kickoff Event продйе в нашым студию танця в центрі Міннеаполіс. Буде закуска, напиткы, але головні – буде премєра нового фільму танця «Мамко Моя Люба» – котрый є гуляный і названый в чест співанкы Мариі Мачошковой під тым самым наголовком. Вкажу тіж фраґмент нового твору, над котрым роблю, а котрый танцую до пісні «Пішла Дівка» з найновшой плтані «Поклоны» Домінікы Новотной.

Пляную удоступнити фільм до обізріня онляйн іщы того літа, буде то через Vimeo, котре єст всядиль доступне.