До русиньскых школ бы діти могли подорожыти бесплатно

В середу, 7-го юнія засідала в Братіславі словацька влада. Міністры на стірічі обговорили дакілько тем, включно плану Міністерства школства, наукы, досліджіня і шпорту.

Новы правила

Резорт школства на засіданю влады своїх колеґів із владного кабінету повідомив, же планує управити правила даваня грошей законным заступникам (родічам, выхователям) школярів на транспорт школярів основных і шпеціалных основных школ до школы і назад до місця тырвалого перебываня. Дотуляти бы ся то мало припадів, кідь в місці тырвалого перебываня не мають зряджену школу або секцію школы з односным навчалным языком. Міністерство школства, наукы, досліджіня і шпорту пропонує брати до увагы навчалный язык школы і давати грошы на транспорт школярів до наблизшой школы і назад до місця тырвалого перебываня.

Бенефіт про народностны школы

Нова пропозіція, котру планує просадити резорт школства, бы была бенефітом головно про школы з навчалным языком народностной меншыны, або з навчаньом языка народностной меншыны.

Пропозція значіть, же покля в селі не є школа, подорожіня школяря до школы – до сусіднього села або міста, де школа є, бы было переплачане державов, і не ішло бы то на втраты родічів. Но так само міністерство хоче бенефіт бесплатного подорожіня дати родічам дітей, котры ся хотять вчіти у своїм материньскім языку – языку народностной меншыны. В тім припаді бы школярь міг подорожыти до школы бесплатно і в тім припаді, же в його селі школа існує. Єдиным условієм про бесплатне подорожіня бы было, же в місці тырвалого перебываня школяря бы была лем школа, котра не мать навчалный язык його материньсый (меншыновый), ани на тій школі не існують класы, де ся такый язык, вєдно з навчалным языком, вчіть і родічі вырішають, же го школяря дадуть до найблизшой школы, де є материньскый язык школяря навчалным языком, або де ся холем його материньскый язык вчіть.

Шанца про русиньскы школы

Новы правила, покля їх резорт школства просадить, бы могли помочі і выниканю русиньскых школ. Села із русиньскым жытельством терплять економічнов міґраційов, што ся одзеркалює на все меншій кількости молодых людей і молодых родин з дітми в них. І завдякы тому на тых селах заникають школы, діти доходжають так ці так до школ в іншых селах або містах, де є навчалным языком язык словацькый.

Покля бы міністерство зачало давати выгоды бесплатного подорожіня школярів до школ, в котрых буде навчалным языком їх материньскый язык, або ся тот язык на школі буде холем вчіти, може то дати імпулз ку выниканю такых школ – наприклад в єднім централнім селі околіці, і так само то може пробудити інтерес родічів о то, жебы до такых школ свої діти дали.

Русиньске школство є пріорітов

Припоминаме, же розвиток русиньского школства собі у 2016-ім році дала до Проґрамового выголошіня влады словацька влада. Подля документу влада завязала ся выпрацовати Концепцію розвитку навчаня русиньского языка і културы в матерьскых школах, основных школах і середніх школах.

На основі того Міністерство школства, наукы, досліджіня і шпорту Словацькой републікы скликало робочу ґрупу, в котрой складі суть робітници Інштітуту русиньского языка і културы Пряшівской універзіты в Пряшові і русиньскы педаґоґове. Робоча ґрупа мала минулый рік свої стрічі в Братіславі і в Пряшові. В рамках ньой зачали ся розвивати і різны актівности, зачав ся досліджати і інтерес о навчаня русиньского языка ці формы, як русиньскый язык запровадити до школ. О зрдяджіня школ з навчаньом русиньского языка вже проявили школы в окресі Меджілабірці. Роздумує ся і о навчаню русиньского языка на Педаґоґічній і соціалній академії в Пряшові.

Жрідло фотоґрафії: TASR

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА