Днес во Свиднику – театральні

Не могли сме Вас рано поінформувати перше з причыны авариі серверів, але уж тепер єст нагода – днес, другій ден 3. річника Русиньского Фестівалю во Свиднику.

По вчерашній стрічы з Обществом св. Йоана Крестителя (орґанізацийом, котра была основана Александром Духновичом в 1862 р.), діючым на ниві реліґійного, народового і культурного розвитку Русинів, днес пришол час на театральний ден.

Зачал ся він рано о 9.00 год. пєсом про діти Ві-фінтена прінцесса. То приповідка о єдній прінцессі, котру треба хоронити пред небезпеком, ідучом од сучасного королівства, котрым єст залежніст од компутера.

Іщы днес вечером в свидницкым Домі Культуры выступит єдиний во світі професийональний русиньскій театр. То Театр Александра Духновича з Пряшова, котрий вкаже пєсу О двох ґенералах, на мотывах оповіданя Михаіла Салтыкова-Щедрина. Більше о тій пєсі чытайте за тым мотузком.

Перед нами іщы цілий тыжден фестівальовых атракций:

• середа, 27. мая, 11.00 год. – стріча з представниками Інституту Русиньского Языка і Культуры Пряшівского Університету,
• середа, 27. мая, 16.00 год. – стріча з представниками Стоваришыня Руска Бурса з Ґорлиц, а пак концерт ансамблю “ТЕРОЧКА”, діючого при Рускій Бурсі,
• четвер, 28. мая, 19.00 год. – презентация книжкы “Андрей Ґавуля” та проєкция фільму і бесіда.

Од пятниці 29. мая, фестіваль перенесе ся уж до свидницкого амфітеатру, в котрым до неділі 31. мая выступит парудесят ансамблів і солістів. За детальнійшыма інформациями позерайте долов, або на сайті фестівалю www.rusinskyfestival.sk.